تعالى أسألك سؤال غريب شوية ومرعب، هيخلي دماغك تلف.. هو لو إحنا كبشر قدرنا نخرج من العالم ثلاثي الأبعاد اللي احنا عايشين فيه، ونسافر لعالم رباعي الأبعاد.. أيه شكل الحياة اللي ممكن نعيشها أو نشوفها وقتها؟!
الحقيقة السؤال ده على قد ما هو يبانلك سهل، لكن هو في الواقع من أصعب الحاجات اللي ممكن الواحد يتخيلها، ويمكن مرعب لدرجة هتغير تفكيرك وممكن تسببلك أزمة وجودية لو أنت قلبك خفيف.. ف عشان كده عايزك تجيب كوباية الشاي الحلوة بالنعناع بتاعتك، وتعالى بقى نتخيل حاجة زي دي مع بعض في سلسلة مقالات جديدة ومبهرة
مدخل للأبعاد الأربعة
شغل دماغك معايا.. ومتنساش لو الموضوع عجبك تعمل شير للبوست عشان تساعدني في نشر الموضوع أكتر للناس وتدعم المجهود اللي ببذله في الكتابة.. إعمل منشن لصحابك المهتمين بالمواضيع المذهلة دي
بص يا عم.. مبدئيًا.. عشان نفهم أيه تأثير البعد الرابع ده علينا، لازم نفهم يعني أيه الأبعاد دي أصلًا..
الأبعاد دي يا سيدي ممكن نعرفها على إنها عبارة عن الإتجاهات اللي أنت كإنسان ممكن تتحرك أو تبص فيها.. وعشان تفهم أكتر، خلينا نتخيلهم مع بعض..
البعد الأولاني ممكن تتخيله على إنه البعد رقم صفر.. وده عبارة عن نقطة.. حاجة مالهاش أي إحداثيات ولا شكل فيزيائي حقيقي غير انها موجودة بس.. حاجة شبه النقطة اللي في آخر الجملة دي كده.
طبعًا بُعد زي ده مفيهوش أي قوانين فيزيائية أصلًا عشان يقدر يتكون جواه كائنات حية.. النقطة دي هي البعد ده كله أصلًا.. العالم أو الكون بتاع البعد الصفري ده كله هو عبارة عن النقطة دي.
طب أومال البعد الأكبر منه هو عبارة عن أيه؟
شوف الصورة الجاية
الأكبر منه يا سيدي هو البعد الأول.. وهو حاجة بسيطة جدًا.. مجرد خط واحد بس زي ده كده
وعشان تعرف تتخيل الفرق ما بين البعدين دول، فيكفي إني أقولك إن كل اللي عملناه عشان ننتقل من بعد معين، للبعد اللي فوقيه أو الأعلى منه، هو إننا نرسم خط أو نتحرك بشكل عمودي على البعد الأقل..
يعني أيه؟!.. يعني عشان تتحرك من البعد الصفري اللي هو النقطة (.) للبعد الأول اللي هو الخط (|) ف أنت رسمت خط عمودي على النقطة اللي كانت في الأول.. بمعنى إنك (خلقت) إتجاه جديد مكانش موجود قبل كده.. الإتجاه ده هو (فوق).. وبكده، بقى الكون بتاعك كله عبارة عن خط (طول Length) واحد طويل مالوش عرض..
وطبعًا مفيش كائنات ينفع تبقى متواجدة في كون زي ده بردو، لإن الروابط الكيميائية والفيزيائية بتاعتهم مش هتبقى مستقرة، وهتبقى مقيدة في بعد واحد بس.. مش هتعرف تتحرك للجنب مثلًا على الخط ده.. كل اللي هتعرف تعمله هو إنك تمشي لفوق أو لتحت.. ولو فرضنا إن في إتنين كائنات عايشين ع الخط ده، ف هما مش هيقدروا يعدوا من بعض.. يعني اللي تحت هيفضل طول عمره تحت، واللي فوق هيفضل طول عمره فوق.. لإن مفيش إتجاه إضافي يخلي الكائن اللي تحت يقدر يعدي من اللي فوق..
طب والبعد الأعلى من ده كمان؟!..
البعد الأعلى من ده يا سيدي هيبقى مختلف تمامًا عن اللي قبل كده، وأوسع منه بكتير.. عشان تقدر تتخيله، هتطبق نفس القاعدة اللي قلنا عليها.. إرسم خط عمودي على الخط الأولاني، عشان تخلق إتجاه جديد مكانش موجود قبل كده..
فبالتالي لما تعمل ده، هيتكون عندك شكل زي اللي في الصورة كده.. الكون بتاعك فجأة إتكون جوه اتجاه جديد، هو إتجاه (العرض).. يعني بقيت تقدر تمشي لفوق وتحت، وكمان في إتجاهين جداد اللي هما (شمال) و(يمين).. وساعتها الكون بتاعك مبقاش مجرد خط.. لأ ده سطح ثنائي الأبعاد لو قارنته بالخط اللي كان عندك في الأول هتلاقي إنه أضخم منه بقدر لا يقاس.. زي الفرق بين الورقة والخط اللي أنت ممكن ترسمه عليها..
وهنا بقى الكون بتاعك هيبقى غريب جدًا.. الكائنات اللي عايشة عليه هتبقى كائنات مسطحة، ثنائية الأبعاد، مالهاش غير بعدين بس.. فبالتالي لو اتخيلت ان الكائنات دي عايشة على ورقة، فهي متقدرش ترفع عينيها من الورقة دي عشان تبصلك!!.. وده عشان هما معندهمش اتجاه (الإرتفاع) أصلًا.. ده عندك أنت بس..
فبالتالي قدراتك أنت ككائن ثلاثي الأبعاد بالنسبة للكائنات المسطحة اللي عايشة على الورقة دي هتبقى أسطورية، أشبه بقدرات الآلهة!!
إزاي؟!.. شوف الصورة الجاية
أسطورية وإلهية إزاي يا عم إحنا هنلحد ولا أيه؟!.. يا عم هقولك متستعجلش..
الأول هنعمل الخطوة اللي عملناها في الأبعاد اللي قبل كده.. هنرسم خط متعامد على الخطين بتوع الأبعاد اللي قبل كده.. زي الصورة اللي فوق قدامك دي.. وبكده هيبقى عندك إتجاه جديد مكانش موجود قبل كده.. الإتجاه ده هو (أعلى) و(أسفل)..
فجأة، الكون بتاعك هيتحول من مجرد ورقة مسطحة ضخمة، لشكل الكون الكامل اللي أنت عايش فيه وبتشوفه حواليك ده.. متخيل فرق الحجم والضخامة ما بين الإتنين؟!.. متخيل الصدمة اللي ممكن كائن ثنائي الأبعاد يتصدمها، لو عرف حاجة زي دي، أو قدر يشوف الكون ثلاثي الأبعاد بتاعنا ده شكله عامل ازاي وحجمه قد أيه؟!
متتخيلش، عشان هو مش هيقدر أصلًا.. قولي ليه..
عشان أجسام الكائنات ثنائية الأبعاد دي، مش مصممة أصلًا لإنها تشوف البعد التالت.. يعني مثلًا تعالى نتخيل واحد من الكائنات المسطحة دي، ونشوف حياته ممكن تبقى عاملة إزاي، وتركيب جسمه البيولوجي شكله أيه..
شوف الصورة الجاية
الكائن اللي انت شايفه قدامك ده ممكن نتخيل إنه إنسان عادي، بس في عالم ثنائي الأبعاد.. لو هنتخيل إنه عايش في البعد ده، فبالتالي هو مش هيبقى في عنده أي شيء تاني مختفي عن عيونك.. هو الجسم اللي مرسوم في الصورة اللي أنت شايفها دي هو كل حاجة..
طب أعضاء جسمه اللي جوه دي هتشتغل إزاي؟!.. يعني أبسط حاجة مثلًا، تفتكر هياكل ويشرب إزاي؟!
لو تخيلنا إنه زينا كده، هيحتاج ياكل ويشرب، فهو في الحالة دي هيحتاج يبقى عنده فتحه ياكل منها اللي هي (الفم)، وفتحه تانية يخرج منها الفضلات بتاعته اللي هي (الشرج).. بس المشكلة بقى هي إنه معندوش إلا بعدين بس.. فبالتالي لو أنت رسمته على الورقة زي اللي فوق كده، وتخيلت أجزاء جسمه الداخلية، هتلاقي إن عشان تعمله فتحة فم، وتوصلها بفراغ للمعدة، وبعدين تعمله فتحة شرجية متصلة بالأمعاء، فأنت كده في الواقع هتكون قسمته نصين!! مش هينفع يعيش كده أصلًا، لإنه كده اتقطع لنص يمين ونص شمال، ومبقاش كائن واحد!!
فبالتالي عشان يقدر يعيش بشكل طبيعي، هيحتاج مثلًا إنه يبقى شبه الصورة الجاية دي
زي ما أنت شايف في الصورة كده.. الكائن ثنائي الأبعاد هيحتاج إنه ياكل ويشرب وكمان يتبرز ويخرج الفضلات بتاعته من نفس الفتحة!!
ومش دي أغرب حاجة.. ده دي مجرد تخيل بسيط وصغير جدًا لحاجة لا نهائية التعقيد، ومليانة احتمالات.. الكائنات دي ممكن يبقى ليها مليون شكل مختلف، ومحدش فينا ممكن يتخيل هي هتبقى عاملة إزاي لو كانت موجودة فعلًا!!
طب لو رجعنا لموضوعنا، وتخيلنا إن واحد من الكائنات المسطحة دي، عايز يخرج من العالم بتاعه ويتواصل معانا، أو العكس.. لو إحنا عايزين نتواصل معاه.. نقدر نعمل كده؟!
الإجابة بردو غريبة شوية.. بص ع الصورة الجاية
إحنا دلوقتي ككائنات ثلاثية الأبعاد، بنقدر نشوف اتجاه زيادة، مفيش حد من الكائنات المسطحة اللي عايشة على الورقة دي يقدر يبص فيه.. فبالتالي إحنا شايفينهم من حتة هما مش شايفننا منها، ولا حتى مستوعبين وجودها أصلًا!!
وفوق كل ده، إحنا مش بس شايفينهم.. لأ ده إحنا شايفين جسمهم الخارجي، وكمان شايفينهم من جوه في نفس الوقت.. شايفين أعضاء جسمهم اللي جوه وهي شغالة.. شايفين دماغهم وهي بتفكر، وعارفين الأفكار اللي فيها.. لو تخيلت إن واحد من الكائنات دي عنده مربع صغير، وإن المربع ده هو عبارة عن خزينة هو مخبي فيها أسرار بتاعته، وقافل الباب بتاع الخزينة، اللي هو واحد من أضلاع المربع..
فبالنسبة لأي كائن تاني عايش معاه على نفس الورقة، مش هيقدر يشوف اللي جوه المربع.. كل اللي هيشوفه هو الخط بتاع الإطار الخارجي بس.. لكن أنت كبشري شايفه من (أعلى)، هتقدر تشوف المربع والأربع أضلاع بتوعه، وكمان المساحة اللي جواه، وكل اللي فيها، وكمان الكائنات اللي بره واقفة بتبص ع المربع، كل ده في نفس الوقت!!
يعني أنت بالنسبة للكائنات دي عبارة عن كائن علوي متكامل القدرات والمعرفة.. عارف كل اللي بيحصل في الكون بتاعهم، وشايفه بيدور قدام عينك في نفس اللحظة!!.. لأ وأكتر من كده كمان، ممكن تشوف اللي هيحصل في مستقبلهم وفي ماضيهم كمان، بإعتبار إن الكون بتاعهم فيه خط زمني كمان..
حتى الزمن بتاعهم هيبقى بالنسبالك عبارة عن خط مفتوح أو ورقة، تقدر تشوف اللي حصل فيها واللي لسه هيحصل كمان شوية!!
ناقصك أيه تاني عشان يفكروا فيك (لو استوعبوا وجودك أصلًا) على إنك إله؟!!
طب استنى استنى.. لسه الحكاية هتحلو.. لو أنت دلوقتي عايز تتواصل معاهم.. هتقدر تعمل كده؟!
شوف الصورة الجاية
عشان تقدر تتواصل مع كائن من البعد التاني اللي هو العالم المسطح ده، فأنت هتحتاج تتخلي عن واحد من الأبعاد بتاعتك..
إزاي؟!
أنت عارف إننا كائنات ثلاثية الأبعاد، صح؟!.. وبالتالي، أجسامنا محتاجة 3 أبعاد عشان تقدر تشتغل وتفضل مستقرة.. يعني كل الأعضاء بتاعت جسمك، وتكوينها، وحتى الفيزياء اللي بتحكم الروابط الكيميائية اللي بتكون العالم اللي أنت عايش فيه، محتاجة تبقى ثلاثية الأبعاد عشان تشتغل بشكل صحيح.. طب حلو أوي..
لو أنت بقى جيت وقررت إنك هتنزل على العالم المسطح ده عشان تعيش عليه، مش هتقدر تعمل كده، إلا لو كنت عايز تموت بأشنع طريقة ممكن تتصورها.. إزاي؟!
عشان هتضطر تتخلى عن بعد الإرتفاع بتاعك!!.. وبالتالي جسمك كله هينضغط وينسحق عشان يبقى مسطح زي الورقة.. شفت كارتون توم وجيري كده؟!.. شفت لما الصخرة كانت بتقع على توم، وتعمله سجادة صغيرة لازقة في الأرض؟!.. متخيل مدى الألم اللي هتتعرضله في عملية زي ده، ومدى البشاعة اللي هينفجر بيها جسمك لما ينضغط بالقوة دي عشان يبقى ثنائي الأبعاد؟!
ويا ريت بعد كل ده هينفع تعيش.. لأ يا صديقي، أعضاء جسمك كلها هتكون باظت خلاص، كإنك قطعتها شرايح رفيعة جدًا لدرجة إن مالهاش أي (سُمك أو Thickness) أصلًا.. فبالتالي عدد الخلايا اللي بتكون جسمك هيكون قل لدرجة لا تستوعب، وهتبقى مجرد شريحة اتقطعت من جسم متكامل..
كإنك رحت للجزار، وقطع منك حتة كده، وعمل منك لانشون فراخ.. عارف الشيكي دودو؟!
هتتحول لـ Slice بطعم الستروبيري يا صديقي يا فراولاية يا جميل..
طب خلاص، بلاش نعمل كده عشان الموضوع مرعب وبشع.. مفيش طريقة تانية نقدر نتواصل بيها مع كائنات العالم المسطح لو إحنا عايزين؟!
في طبعًا.. طريقة وهمية.. أقصد وهمية بجد، مش بطبل للطريقة يعني.. سامعك بتسألني إزاي يا عم علام؟!
هقولك.. عمرك سمعت عن الضل؟!
شوف الصورة الجاية
اللي أنت مش واخد بالك منه بقى، هو إنك بالفعل بتتواصل مع كائنات العالم المسطح كل يوم من غير ما تاخد بالك!!
إزاي؟!.. يا عم سهلة.. شايف الضل بتاعك اللي منعكس دلوقتي على الحيطة؟!.. أهو ده شكلك لما اتحولت لكائن ثنائي الأبعاد!!
خدها قاعدة كده.. الضل بتاع أي شكل بيقلل من الأبعاد بتاعته بمقدار واحد.. يعني ضلك ككائن ثلاثي الأبعاد عندك طول وعرض وارتفاع، لو انعكس على الحيطة اللي جنبك، هيتحول لشكل ثنائي الأبعاد بس.. حاجة أكيد مفهومة يعني.. بص على شكل الضل بتاع كفك دلوقتي على الأرض وأنت هتستوعب..
لو تخيلت مثلًا مكعب في العالم بتاعنا.. وجيت نورت عليه بالكشاف، هتلاقي إن ضله على الحيطة بقى واخد شكل مربع.. ولو جبت هرم وحطيته قدام الكشاف، هتلاقي شكله بقى مثلث.. ولو جبت كورة وحطيتها قدام النور، هتلاقيها بقت دايرة..
فبالتالي لو أنت عايز تتواصل مع كائن من العالم المسطح، ممكن تظهر في العالم بتاعه بالضل بتاعك!!
طبعًا الموضوع هيبقى مفاجيء ومرعب بالنسباله.. تخيل كده أنه واقف بيلعب كورة ثنائية الأبعاد مع صحابه، وفجأة لقى ضلمة ظهرت قدامه من العدم حرفيًا، وبدأت تتحرك وتعمل أشكال مش مفهومة لعقله ثنائي الأبعاد كإن ليها حياة خاصة!!
أكيد هيموت من الرعب.. خصوصًا إنه مش هيبقى مستوعب إن اللي قدامه ده مش كائن.. بل هو مجرد ضل كائن منعكس على العالم بتاعه.. تخيل بقى لو شافك بجد!!
عقله هيعمل إيرور، وممكن يتحرق من هول الصدمة.. ببساطة أصلًا مش هيقدر يستوعبك، عشان هو عقله أصلًا معندوش القدرة دي.. هيتجنن..
ومن هنا، تقدر تطبق ده على اللي هيحصلك أنت بقى، لو شفت كائن من الكائنات العلوية فائقة القدرات والمعرفة اللي الأديان السماوية مثلًا اتكلمت عنها..
الجن والملائكة والشياطين.. كل الكائنات اللي مبنقدرش نشوفها دي، برغم إننا عارفين إنها موجودة وشايفانا دلوقتي.. إزاي ممكن تظهر للبشر، وتتشكل في أشكال نقدر نستوعبها، وإزاي قدراتها خارقة وفائقة المعرفة كده بالنسبالنا؟!
شوف الصورة الأخيرة
سؤال مهم أوي، والاحتمالات اللي ممكن تطلع منه مرعبة فعلًا.. فخليك فاكر السؤال بقى، وإستناني في الجزء الثاني من سلسلة الأبعاد وخد نفس عميق عشان الرحلة هتطول، وهتغيرلك تفكيرك في ماهية الكون والعالم، وحتى الأديان نفسها، للأبد..
بقلم : محمود علام
