من أكتر الأشياء المفزعة للمصورين و الإديتورز و الريتاتشر ومصممين الجرافيك هو موضوع الألوان و الإختلافات و الإنحرافات التي تحدث في الألوان من شاشة لأخرى أو من الشاشة للموبايل لذلك يجب توضيح بعض المعلومات المغلوطة لدى عدد كبير من المصورين.
أولاً: إختلاف الألوان من شاشة لأخرى
طبيعي جداً ان يكون فيه إختلاف و أحياناً يكون الإختلاف كبير جداً من شاشة لأخرى و دا لعدة أسباب خلينا نتعرف عليها مع بعض
اختلاف نوع الشاشة و أحياناً الموديل للشاشة ويترتب على ذلك إختلاف الـ Color Profile لهذه الشاشة مثلاً شركة HP تصنع الشاشات ويتم معايرة ألوانها بطريقة معينة ويتم إستخدام وحدات إضاءة معينة في التصنيع لذلك ستجد ان ألوانها مختلفة عن شركة أخري مثل Dell أو سامسونج او غيرها من الشاشات نفهم من كدا أن كل شركة مصنعة لها مواصفات و تستخدم متريال معينة في التصنيع و هذا يترتب عليه إختلاف الألوان من شاشة من ماركة زي HP علي سبيل المثال بشاشة أخرى من شركة Dell مثلاً ولا يقف الأمر عند هذا الحد فقط بل أن موديل الشاشة من الشركة الواحدة يتختلف في المواصفات نجد ان شركة HP تقوم بتصنيع موديلات متعددة من الشاشات لماذا ؟
بالطبع هي طريقة تسويقية فمثلاً الشاشة التي يحتاج إليها مصمم الجرافيك لن يحتاج إليها الجيمرز أو المحاسب الذي يستخدم برامج مثل وورد و إكسيل فهو ليس بحاجة إلي دقة الألوان العالية وما يترتب عليها من زيادة في سعر الشاشة و أيضاً الجيمرز يحتاج إلي شاشة بمعدل استجابة عالي ولن يجد هذا في الشاشات المخصصة لمصممين الجرافيك وسوف نذكر عدة أمثلة من شركة HP
تقوم الشركة بتصنيع موديل يطلق عليه
HP z27i ولتوضيح هذا نجد أن أول حرفين هما إختصار لإسم الشركة و حرف Z يعني خط الإنتاج للشركة أما الـ 27 فهو حجم الشاشة و حرف الـ I هو الفئة لهذه الشاشة يتم تصنيع هذه الشاشة لفئة مصممين الجرافيك الهواة بحيث يمكنه الحصول علي جودة عالية مقابل سعر معقول وهي تستهدف شريحة كبيرة جداً من المستخدمين لذلك كما ذكرنا من قبل أن الموضوع تسويقي في المقام الأول
ثم ننتقل إلى موديل أخر من نفس الشركة و هو HP Z27s كما ذكرنا من قبل معني هذه الإختصارات ولكن الفئة هنا تختلف حرف S بدلاً من حرف I وهنا تستهدف الشركة مصممين الجرافيك الأكثر إهتماماً بالفيديو و شركات المونتاج وما له علاقة بالفيديو عموماً فهذه الشاشة تأتي بوضوح ممتاز وثبات للألوان كالسابق ذكرها ولكن بدقة عرض 4K لذلك تكون مميزة جدا في العمل لدى مصممين الجرافيك المهتمين بمجال الفيديو.
ثم ننتقل إلي موديل آخر و هو HP Z27x وهنا تستهدف الشركة محترفي التصميم و التصوير من يهتم حقاً بالجودة العالية في الألوان حيث تأتي هذه الشاشة بـ COLOUR SPACES sRGB D65, sRGB D50, Adobe RGB, DCI P3 BT.709, BT.2020 و هو ما يجعلها مميزة جداً للمصممين المحترفين كما أنها تحتوي أيضاً علي مخرج خاص لتركيب جهاز معايرة ألوان الشاشة وتقوم الشاشة بعمل معايره وضبط للألوان بنفسها بدون الإعتماد علي سوفت وير خارجي ما يجعلها أفضل شاشة من الشركة للمصورين ومصممين الجرافيك
وأيضاً تقوم الشركة بإنتاج موديلات أخرى مناسبة للأعمال الروتينية فهي شاشات رخيصة السعر لكنها تفي بالغرض ولا تنافس الشركة في مجال إنتاج شاشات الجيمرز حتي الأن, فقد يختلف ذلك في المستقبل فهي في الأساس تستهدف الشركات.
بعد هذا التوضيح نجد أنه من الطبيعي جداً ان تختلف الألوان من شاشة لأخرى ” كلٍ لما صُنع له ”
نفهم من كدا إيه أن من المستحيل أن تشاهد صورة ما على جميع الشاشات بنفس الألوان و أن الفيصل في صحة الألوان هي الطباعة.
ثانياً: خدعة شاشات أبل
بما أني شغال في مجال الكمبيوتر و شراء و بيع الأجهزة بقابل كتير ناس تكلمني حد قالهم شاشة أبل هي أفضل شاشة للجرافيك ويطلب مني شاشة أبل ! تمام جميل جدا حضرتك سعر الشاشة كذا …. يقولي لا انا شوفت واحدة معروضة بـ 2000 جنيه أيون تمام مظبوط بس دي موديل 2008 و كمان LCD مش LED يعني تكنولوجي قديم يقولي اه ما هي احسن من الجديد لأنها ابل !!!
الكلام دا مغلوط تماماً يا جماعة زي ما قولنا في مثال شاشات HP ان الشركة بتستهدف شرائح مختلفة من المستخدمين و شركة أبل بتستهدف شريحة مصممين الجرافيك بشكل صريح بالتالي هي بتحاول تقدم تكنولوجي مميز جدا ليهم الشاشة دي فعلاً كانت ممتازه جدا وألونها كانت احسن حاجة بس الكلام دا في 2008 لما كانت لسة الناس بتستخدم الشاشات البطيخة الـ CRT طلعت علينا شركة أبل بشاشة رفيعة نسبياً و جودتها عاليا لكن طبعا مستحيل تيجي في 2021 تقولي الشاشة دي أفضل علشان هي أبل و الوانها مظبوطة أكتر من الشاشات الحديثة في حين أن انت بسعرها الـ 2000 جنيه ممكن تجيب موديل حديث استيراد خارج و أفضل منها بمراحل يعني معني كدا أن مش أي شاشة أبل تكون هي أفضل شاشة للمصورين و مصممين الجرافيك.
ثالثاً: ألوان الكمبيوتر تكون نفس ألوان الموبايل
أعتقد بعد ما قرأت اللي فات من المقالة هتكون عرفت أن مستحيل تبقي الألوان واحد بين الشاشتين و كمان أزيدك من الشعر بيتاً انت بتقارن شاشة مثلا 24 بوصة بدقة ألوان FHD يعني الدقة عند 1920X1080 بشاشة الموبايل الـ 7 أو 8 بوصة حسب حجم موبايلك و شاشة بدقة 2K دا إن لم تكن 4K يعني لو قولنا معظمنا شاشة 2K فـ إنت بتتكلم علي دقة 2560X1440 في مساحة 8 بوصة طبيعي جدااااااً أن الوان الموبايل أحلي و أفضل بكتير انت حاطط كل الدقة دي في مساحة صغيرة جداً مقارنة بشاشة الكمبيوتر وكمان الشاشة Glossy يعني زجاج الشاشة لامع مش مطفي زي شاشة الكمبيوتر مافيش مجال للمقارنة أساساً.
رابعاً: عايز أعلي جودة و دقة لصوري أعمل إيه ؟
لازم تفهم الموضوع دا ماشي إزاي الموضوع بيبداء من أول الكاميرا بتاعة حضرتك ثم المعالجة علي الكمبيوتر بإستخدام شاشة مناسبة ويُعتمد عليها و أخيراً عملية الطباعة Color Management Workflow
يعني صورتك بتمر بعدة مراحل هي : Photography or Scanning – Processing – Printing
و علشان تفهم الموضوع دا بقي بالتفصيل إتفرج علي الفيديو اللي بيقدمه مستر بولس إسحاق عن تفاصيل ضبط الألوان بداية من التصوير حتي عملية الطباعة
إتفرجت على الفيديو تعالى نكمل كلامنا : إنسي خالص موضوع مقارنة الموبايل بشاشة الكمبيوتر أو مقارنة التلفزيون أو أي شاشة بأخرى – أكيد فهمت دلوقت و عرفت أن علشان تحصُل على الجودة العالية هي عملية مكلفة مش حاجة بسيطه و هنا هسئلك سؤال
هل العائد المادي من هذا العمل يستحق دفع التكلفة؟
طبعا السؤال دا انت الوحيد اللي يقدر يجاوب عليه كمان الإجابة هتكون مختلفة من شخص لآخر لذلك كل واحد هيقدر يحدد بعد ما يسئل نفسه السؤال دا هل هيستثمر فلوس أكتر من أجل الحصول علي الجودة دي ولا هيكتفي عند قدر معين لكن خليني أوجه ليك نصيحة لو انت هاوي التصوير بلاش تنفق علي الجودة دي أكثر من اللازم خليك في المعقول ولو انت لسة مبتدئ إصرف علي شغلك بقدر معقول و بالتوازي علشان مافيش جانب يقع منك لحد ما توصل لمستوي عالي أما لو انت محترف و دا مجال شغلك و دخلك معتمد عليه في الحالة دي هقولك إصرف يا أستاذ طارق ميهمكش😂
في النهاية أتمني يكون الموضوع عجبك و تكون إستفادت منه و لو في أي استفسار إكتبلنا في كومنت في الموضوع و متبخلش علينا بالشير و دعوة أصحابك ودعم الموقع لتقديم المزيد.
