الخبر ده يا سيدي هو إن من ييجي شهر كده، في مجموعة باحثين في جامعة (بريجهام يونج Brigham Young) الأمريكية قدروا يوصلوا لتكنولوجيا بتخليهم يخلقوا صور هولوجرام ضوئية مجسمة في الهوا، شكلها زي الحقيقي، باستعمال مجسات صغيرة من الليزر!!
مجموعة الباحثين دول إسمهم (مجموعة أبحاث التصوير المجسم)، واللي عملوه بالضبط عشان يوصلوا للتقنية دي هو إنهم الأول صمموا ابتكار فازوا عليه بجوايز وكان قالب الدنيا من 3 سنين، اسمه (المصيدة البصرية Optical Trap Displays).. الإبتكار ده كانوا من خلاله بيقدروا يعزلوا جسيم ذري واحد في الهواء ويعلقوه ف مكانه باستعمال شعاع ليزر.. وبعدين بيحركوا الجسيم ده باستعمال شعاع الليزر، فبيكون شكله كإنه بيطير في الجو ببطء وهو سايب وراه مسار منور بأضواء نيون كده.. كإنه طابعة ضوئية ثلاثية الأبعاد!! هتشوف شكله في الصور تحت
يعني مثلًا قدروا يصمموا كائن صغير كده بالليزر عامل زي ال Stick Man، وخلوه يتمشى ويتنطط فوق صباع واحد من الباحثين هتشوف شكله في صورة تحت هنا
واضح إن شكل المستقبل اللي جاي هيبقى مختلف جدًا بفضل التكنولوجيا دي.. وطبعًا في ناس كتير ممكن تخاف وتفتكر نظرية المؤامرة المشهورة بتاعت الشعاع الأزرق اللي بتقول إن الماسونية وحكومة العالم الجديد هتيجي في آخر الزمان وتعمل مؤامرة على العالم وتوهم الناس ان في غزو فضائي باستعمال تكنولوجيا الهولوجرام دي، عشان توهمهم ان في حضارة تانية بتهاجم الأرض.. وبعدين يوحدوا الحكومات والجيوش تمهيدًا لظهور المسيح الدجال!!
أنا قرأت كتير عن النظرية دي والحقيقة هي تنفع فكرة رواية أو فيلم ممتاز، ومُلهِمة جدًا.. لكن بالنسبة لمدى صحتها أو قابليتها للحدوث، فأنا معنديش فكرة.. وإن كنت أتوقع إنها احتمالية ضعيفة للغاية..
بس طبعًا كل واحد وطريقة تفكيره اللي تخليه يصدق حاجات ويكذب حاجات تانية.. أنا هنا وظيفتي إني أوريك اللي بيحصل حواليك في العالم، والتقنيات المبهرة اللي هتشوف النور قريب، والمعاني المحتملة اللي ممكن تحصل من وراها.. التفكير في اللي جاي وتحليله ده مهمتك أنت..
ولو الموضوع عجبك، متنساش تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في الكومنتات
