الثقوب السوداء … حقيقة أم خيال

شايف الصورتين اللي قدامك دول؟! 👇 

 الصورة الأولانية  خالص دي كلنا عارفينها، اللي لقطها تليسكوب أفق الحدث Event Horizon Telescope للثقب الأسود العملاقSupermassvie Blackhole اللي موجود في مركز مجرة M87..

 الكلام ده حصل في بداية سنة 2019، تحديدًا يوم 10 إبريل، والموضوع وقتها قلب الدنيا كلها وعمل ثورة ف المجتمع العلمي عشان كان أخيرًا بينقل حقل دراسة فيزياء الثقوب السوداء من الخيال اللي كانت فيه بقالها سنين طويلة، للواقع الحقيقي اللي كلنا عايشينه.. 

ولأول مرة العالم شاف شكل الثقب الأسود اللي بتنكسر عنده كل قوانين الفيزياء والعلوم اللي نعرفها..

ده لينك للمرة الأولى اللي تم الكشف فيها عن الصورة، وكل تفاصيلها:

بس الصورة التانية اللي تحتها دي بقى، هي عبارة عن لقطة واسعة المدى Wide Shot، لقطها مرصد تشاندرا لأشعة X التابع لوكالة ناسا، أو Chandra X-Ray Observatory، لنفس الثقب الأسود اللي تم الكشف عنه سنة 2019 ده.. 

بس المرة دي بقى، الصورة بتوريك مظهر مهيب لشكل الفضاء المحيط بالثقب الأسود ده لما ترجع بمنظورك لورا، وتشوف المنظر المخيف والمبهر ده..

اللي أنت شايفه في الصورة ده هو عبارة عن ناتج إستهلاك الثقب الأسود ده لمئات، ويمكن آلاف وملايين النجوم اللي حواليه.. وعشان كده طالع منه تدفق عملاق من الجسيمات عالية الطاقة High Energy Particles ، اللي بتمتد لمسافة أكتر من 1000 سنة ضوئية كاملة!!

تخيل أنت.. أنت لاقط المشهد ده من مرصد صغير هنا على الأرض، حجمه أشبه بحجم ذرة غبار وسط العاصفة العملاقة اللي أنت شايفها قدامك في الصورة دي.. 

الموضوع فعلًا بيعرفك حجمنا الحقيقي كبشر، وسط البحر الفضائي العملاق اللانهائي الممتد حوالينا ده.. وأد أيه إحنا بكل حياتنا وأحلامنا وطموحاتنا دي، عبارة عن لا شيء حرفيًا، وسط عظمة الكون المهيب..

فكر ف ده المرة الجاية اللي ترفع عينك فيها على السما وأنت بتتأمل أو بتدعي ربنا.. وقول سبحان الله ❤

وكالعادة أنت خلاص عارف بقى.. متنساش الشير عشان تساعدني، والمنشن لصحابك، ورأيك أنت وهما ف الكومنتات تحت 👇