نصائح للعروسين قبل التصوير الخارجي

تعودنا في المدونة الحديث عن الكاميرا وشرح التصوير الفوتوغرافي

لاكن هذه المرة الحديث سوف يكون للعروسين الراغبين في التصوير الخارجي

في التصوير الخارجي وقت التصوير ليس عادة تربينا عليها منذ الاجداد وهي ناخد صورتين نحتفظ بيهم علشان نفرج عيالنا علي شكلنا لما كنا عرسان

ايون دي حقيقة احنا اتربينا علي كدا

وجه الوقت اللي لازم نكسر فيه القواعد و الروتين دا

طب ايه الفرق بين التصوير الخارجي و تصوير الاستديو

في التصوير الخارجي انت بتكون في مكان من اختيارك اي مكان تحبه

وقت التصوير عبارة عن خروجة جميلة ليك انت و العروسة قبل الزفاف تشيل رهبة اليوم و وجع الدماغ اللي بيحصل يوم الفرح كمان تاخد علي عروستك وتهزر وتضحك وتجري وتلعب وهي تاخد عليك

باختصار بيكسر الحاجز اللي بينكو

في التصوير الخارجي انت غير مقيد بحركات محدده يوقفهالك صاحب الاستوديو ويقولك بص هنا اعمل كذا ومتعملش كذا

لا خالص الصور تلقائية بتسجل لحظات جميلة بينكو في اليوم دا

الخلفيات بتاعتك طبيعية مش متصور امام كروما مع شوية شغل فوتوشوب قص ولزق

لا بالعكس انت بتتصور امام خلفيات طبيعية في هواء طلق

الي حد ما دي بعض المميزات اللي بتميز التصوير الخارجي لان فعلا مميزاته كتير جدا

طيب نيجي للجزء المهم بقي

اي حد بيتصور عايز صوره تطلع حلوه ….. طبعا دي لا جدال عليها

وصدقني المصور بيكون نفسه صورك تطلع حلوة اكتر منك لان دا شغله ودي سمعته

طيب ايه الحل …. علشان صوري تطلع حلوة ومميزة

بص يا سيدي …..!!!

حقيقة مش بهزر الموعد مهم جدا جدا جدا ليك و للمصور

عادتا موعد التصوير بيكون قبل الغروب بساعة ونص ساعتين تأكد تماماً ان كل دقيقة بتضيعها في التأخير عن السيشن كانت هتبقي صورة حلوه في الالبوم بتاعك

هتتأخر هتتسبب في ضيق الوقت ولان اجمل وقت للتصوير هو في الضوء الطبيعي ومستحيل الاضاءة الصناعية تطلع نفس الخلفية ونفس الجودة في الصور

هتربك نفسك انت وعروستك و هيبقي المصور عمال يجري بيك من مكان لمكان علشان ياخد اكبر عدد ممكن من الصور

لو مجهز وقفات و حاجات في دماغك هتنساها لضيق الوقت اللي انت السبب فيه

علشان كدا بأكد تاني الوقت … الوقت ….. الوقت

عايز صورك تطلع حلوة …. ابعد عن الاماكن المزدحمة اللي فيها ناس كتير 

للاسف هتسمع كلام مش هيعجبك وناس هتتريق و ناس هترخم وحاجات مش ظريفة

اختار ديما مكان هادئ ميسببش توتر ليك انت وعروستك

عايز صورك تطلع حلوة …. بلاش تعتبر نفسك طالع فرح وتجيب في السيشن الاهل و الاصحاب و الاحباب و كل اللي تعرفه تجيبه معاك 🙂
هيتسببو في التشويش عليك و علي العروسة ومش هتاخد راحتك و كل شوية دي عايزة تتصور مع العروسة و دي عايز صورة لوحدها …… الخ
لو العروسة عندها اصحاب وهيلبسو لبس واحد ويساعدو في اظهار جمال السيشن اهلا وسهلا بيهم
لو هيجو بهدوم البيت … وكل واحدة عايزة تاخد صورة لوحدها وصوره مع العروسة و صورة جماعية …. الخ يبقي بلاش منهم
بلاااااااااااش اهلك او اهل العروسة تجنبا للنميمة و التريقة 😀
هما جيل واحنا جيل تاني طبيعي تصرفاتنا مش هتعجبهم فيبقي علي ايه خليهم علي اد القاعة و هيتصور هناك فيديو و زي الفل 🙂
عايز صورك تطلع حلوة …… الفتره اللي قبل الفرح اتدرب علي التصوير ادام المراية 😀

ايون مش بهذر والله … كأنك مجنون واقعد بص لنفسك في المراية واضحك وشوف اجمل ضحكة ليك

شوف احسن وقفة شكلك شيك وحلو فيها

و العروسة نفس الكلام …. ليه بقولك كدا …!!
بيجي عريس يقول المصور مطلعني وحش في الصور دي …!!!!!

ازززززاي يعني هو مصور حد تاني مثلا ….؟؟
هو دا انت وهي دي ضحكتك و هو دا شكلك و الله .. المصور مالوش ذنب الكاميرا بتلقط اللي قدامها بنفس شكله مش متضيف حاجة ولا بتمسح حاجة .

اعمل سيرش في جوجل علي Wedding Poses و اتفرج كتير واختار حاجات عجبتك وحاول تتدرب عليها

اثبت انت وجودك متستناش المصور يقولك اعمل كذا او كذا

خليك تلقائي متخافش الصورة اجمل حاجة فيها التلقائية الضحكة التلقائية جميله حتي لو مش عجبك شكلك فيها صدقني هتعجب اللي هيتفرج جدا لانها طالعة من القلب و هو شايفها في الصورة

الصورة بتتكلم علي فكره .. لو ضحكتك مصتنعة بتبان جدا في الصورة

لو تلقائية برضو بتبان في الصورة وبتبقي اجمل واجمل ولما تشوفها بعد سنين تفتكر ايه اللي ضحكك اوي في الصورة دي و ساعتها هتضحك تاني …..

الصورة لتسجيل ذكري لحظات حلوة مرت عليك اليوم دا .. مش علشان تفتكر كنت لابس ايه يومها
عايز صورك تطلع حلوة …. اعتبر المصور صديقك مش واحد جايبه تعملك شغلانة وماشي

لا دا حد جاي علشان يسجل لحظاتك الحلوة خلي في تعاون بينك وبينه

اسمع ملاحظاته هو صور 100 سيشن قبل كدا وعارف ايه اللي بيطلع حلو وايه بيطلع وحش

اسمع افكاره حتي لو كانت مجنونه او غير تقليدية .. هتشوف النتيجة في النهاية لان هو عارف هيعمل في الصور ايه وليه طلب منك تعمل كدا

بلاش تعمل حاجة مفاجأة .. زي مثلا تشيل العروسة وتلف بيها حتي لو عايزها تبقي مفاجأة للعروسة

عرف المصور علشان يظبط الكاميرا وياخد الوضع و الكادر المناسب للتصوير

لان الكاميرا دي ماكينة لازمها تدخل من المصور يعرفها هي هتصور ايه متسمعش كلام اللي بيقولك هو بيعمل ايه دا يا دوب بيدوس علي الزرار 😀
عايز صورك تطلع حلوة …. هات كل حاجة ممكن تساعد علي انك تعمل صورة حلوة زي الاكسسوارات بتاعة التصوير مثلا

لأن في بعض الاحيان مصورين بيجيبوها ومصورين لا يبقي من الافضل هات انت اللي تحبه واتصور بيه

دي بعض النصائح المهمة جدا لكل عريس وعروسة قبل التصوير الخارجي
وبتمني من المصورين اللي هيشوفو الموضوع يشاركونا افكارهم و ايه الحاجات اللي ممكن تبوظ السيشن في التعليقات علي الموضوع