آخر مواطن … في الإتحاد السوفيتي

تخيل معايا إنك رائد فضاء، وإنك طلعت ف مهمة روتينية لمحطة فضائية حوالين مدار كوكب الأرض.. 

هتعمل أيه لو لقيت ف يوم إن الدولة اللي طلعتك للفضاء دي، اتدمرت ومبقتش موجودة على الخريطة أصلًا، وإنك بقيت محبوس بره الكوكب كله، عشان مبقاش في دولة أنت منتمي ليها أصلًا، ومفيش حتى فلوس عشان ترجعلها؟

أهو ده بالظبط اللي حصل مع الراجل اللي في الصور تحت ده  

 

طب مين ده وإزاي؟!.. كوباية شايك الحلوة بقى، وعود النعناع الجميل، وتعالى أحكيلك الحكاية من الأول 

بص يا سيدي.. الحكاية كلها بدأت يوم 18 مايو سنة 1991، لما مهندس الطيران السوفييتي أو الروسي حاليًا سيرجي كريكالوفSergei Krikalev، طلع للفضاء من ميناء بايكونور الفضائيBaikonur Cosmodrome، اللي وقتها كان جزء من الإتحاد السوفييتي، بس هو موقعه حاليًا في دولة إحنا نعرفها بإسم كازاخستانKazakhstan..

الراجل ده كان طالع في مهمة المفروض إنها تستمر لمدة 5 شهور، عشان يعمل إصلاحات ومهمات روتينية، وياخد باله من إدارة محطة الفضاء السوفييتية اللي هي بيسموها مير Mir.. والتدريب بتاعه اللي خده قبل ما يطلع للفضاء وقتها، كان بيأهله إنه يفضل قاعد هناك ال 5 شهور دول بس، مش أزيد من كده..

بس اللي حصله فوق بقى، هي قصة جديرة بفيلم وثائقي😀

عايزك تتخيل إن الراجل ده ف وقت ما هو كان فوق بيتفرج على كوكب الأرض من على بعد حوالي 350 كيلومتر تقريبًا بره سطح الكوكب، حصل الإنقلاب الشهير على الرئيس السوفييتي ميخائيل جورباتشوفMikhail Gorbachev يوم 19 أغسطس سنة 1991.. ونزل الشعب الروسي للشوارع في مظاهرات عارمة، خلت الدبابات بتاعت الجيش السوفييتي تتحرك بعدها في قلب الميدان الأحمر أو ال Red Square.. قلب الإتحاد السوفييتي المرعب .. 

وبعدها الموقف اتلم بس بعد ما كان الثمن عظيم.. والثمن ده كان إعلان انهيار وتفكك الإتحاد السوفييتي ل 15 دولة، وإعلان الدول دي استقلالها التام عن السوفييت.. وبداية انهيار الحزب الشيوعي اللي كان بيحكم روسيا من العشرينات!!

دول زي كرواتيا وسلوفينيا أعلنوا استقلالهم من الإتحاد اليوغوسلافي، ودول زي أوكرانيا وكازاخستان ظهروا لأول مرة كدول مستقلة، وبدأوا ينفصلوا باقتصادهم عن روسيا الأم.. وبسبب ده، الإقتصاد وقع تمامًا وحصل تضخم رهيب أدى لإن المرتبات اللي الناس كانت بتاخدها مبقتش تكفي تجيب وجبتين غدا..

الدنيا باظت تمامًا، وسقوط الإتحاد السوفييتي العظيم كان حديث العالم في وقتها.. خصوصًا ف أمريكا اللي كان بقالها سنين طويلة بتخوض حرب باردة ضد السوفييت، وكانت بتتنافس معاها ف مجالات عديدة، من بينها الحاجة اللي بنتكلم عنها هنا.. اللي هي الفضاء وسباق الوصول للقمر..

وده بيرجعنا مرة تانية لسيرجي..

الراجل ف وسط ما هو على محطة الفضاء الروسية، وبيتفرج على الأرض من بره، دول كاملة وقعت ودول كاملة جت للوجود.. وفجأة، ميزانية وكالة الفضاء السوفييتة اللي طلعته للفضاء مبقتش تكفي أي حاجة، عشان سياسة روسيا وقتها كانت توفير الفلوس بأي ثمن عشان يقدروا يصمدوا قدام التضخم اللي كان ممكن يسبب انهيار كامل للدولة الروسية وقتها.. ف بسبب ده، كل حاجة ليها علاقة بالفضاء اتحولت فجأة لمجرد رفاهية ومالهاش أي لازمة..

طب وأنا يا عم الحج؟!.. مش هتنزلوني ولا أيه؟!.. أنا خللت فوق هنا ومؤخرتي لا مؤاخذة ورمت من القعدة 😅

لا يا صاحبي.. خليك قاعد فوق بقى لحد ما نقولك.. كل الحب  💋

بدأت روسيا في الوقت ده تبيع رحلات للدول اللي كانت عايزة تطلع الفضاء على صاروخ سويوز Soyuz الروسي الشهير، كوسيلة لعمل فلوس.. وفعلًا باعوا رحلة للنمسا ب 7 مليون دولار.. وبعدها رحلة لأول صحفي ياباني يتم إرساله للتصوير في الفضاء، ب 12 مليون دولار.. وغيرهم بعدها كتير.. ومش بس كده.. ده كان في كلام كمان إنهم عايزين يبيعوا محطة الفضاء الروسية كلها باللي فيها، عشان تجيب فلوس!!

أنت متخيل؟!.. يبيعوا محطة الفضاء بالراجل اللي عليها.. اللي هو محطة فضاء استعمال طبيب، وعليها مهندس طيران هدية.. السعر إنبوكس👽

طبعًا الموضوع اتحول لمهزلة، وسيرجي مبقاش عارف يعمل ايه.. خصوصًا إن كان في رواد فضاء تانيين كتير بييجوا يقعدوا معاه شهر ولا اتنين وينزلوا، وهو الوحيد اللي بيفضل قاعد فوق زي الكلب.. خصوصًا كمان إن تخصصه مخليه هو الوحيد اللي يعرف يدير محطة الفضاء دي.. مفيش أي حد من اللي جم كان مهندس طيران، أو مؤهل لإدارة المحطة.. فبالتالي كل حاجة كانت على كتفه هو..

وكان في خطة لإنهم يطلعوا رائد فضاء جديد عشان ياخد مكانه ويدير المحطة، بس للأسف وقفت عشان مكانش في فلوس بردو..

والمشكلة كمان في أيه؟!.. إن هو كان عنده كبسولة سويوز Soyuz Capsule اللي يقدر يستعملها للخروج من محطة الفضاء والدخول للأرض مرة تانية.. ودي بتبقى متصممة للأمان، عشان لو حصل أي مشكلة في المحطة، الرواد اللي عليها يقدروا يهربوا.. بس هو لو كان عمل كده، ده كان معناه إن المحطة هتبقى فاضية تمامًا مفيش حد بيديرها، وهتتدمر تمامًا ويضيع معاها شغل سنين وميزانية ملايين ويمكن مليارات الدولارات اتصرفت على تصميمها وإطلاقها.. ف عشان كده قرر إنه يقعد ويستنى..

برغم إن قعاده ده كان بيهدد بإنه يسببله مشاكل صحية عديدة، زي خطر الإصابة بالكانسر وخطر تدمير عضلاته وعظام جسده، وحتى حاسة البصر عنده كمان، بسبب الإشعاعات الضارة اللي بيتعرضلها بشكل مستمر وهو بره الغلاف الجوي للأرض، بس هو مفكرش ف نفسه.. كل اللي كان بيفكر فيه هو بلده و واجبه ومسؤوليته تجاهها..

وعشان كده فضل مستني كتير جدًا.. قعد أكتر من 10 شهور في الفضاء مستني.. لحد ما الفرج جه في صورة ألمانيا اللي دفعت 24 مليون دولار عشان تشتري مكان لرائد فضاء ألماني يطلع مكانه، ويدير هو المحطة بداله.. الرائد ده كان الألماني كلاوس ديتريش فلاد Klaus-Dietrich Flade.

وفعلًا يوم 24 مارس من سنة 1992، رجع سيرجي أخيرًا للكوكب مرة تانية، عشان يلاقي نفسه نازل في دولة غير الدولة اللي طلع منها.. المدينة اللي نزل فيها اللي هي أركالياك Arkalykh، مبقتش سوفييتة ولا روسية حتى.. بل اتحولت لمدينة في دولة كازاخستان المستقلة!!

تخيل أنت.. تخيل إنه في الوقت اللي قضاه على المحطة في الفضاء، المدينة اللي كان عايش فيها هو ومراته وابنه مبقتش إسمها ليننجرادLeningrad.. بقى إسمها سانت بيترسبرج St. Petersburg.. تخيل إنه على محطة الفضاء دي، لف حوالين الأرض أكتر من 5000 مرة.. وفي الفترة دي، مساحة دولته قلت بقدر يزيد عن 5 مليون كيلومتر مربع!!!

تخيل إن حتى الفلوس اللي كان بياخدها، أو المرتب بتاعه، اللي هو كان 600 روبل، واللي قبل تفكك الإتحاد كان يعتبر راتب عالي جدًا، مبقاش ليه أي لازمة بعد ما رجع الأرض، بسبب التضخم الإقتصادي Inflation.. لدرجة إن سواق الأوتوبيس بتاع النقل العام بقى بيقبض أكتر من ضعفين المرتب بتاعه!!

عايزك بس تتخيل شكله وهو خارج من كبسولة السويوز بعد ما رجع للأرض أخيرًا، والكاميرات بتصوره وهو بيخرج من الكبسولة، عرقان وشاحب و وشه الدم هربان منه.. لابس بدلة فضاء عليها علم الإتحاد السوفييتي، اللي هو اتحل واتفكك خلاص بقاله سنة!!.. آخر مواطن لدولة مبقتش موجودة على الخريطة أساسًا!! هتلاقي شكله وهو خارج من الكبسولة في صورة ف تحت 👇 شوفها وشوف النظرة على وشه.. 

قصته وقتها كانت قالبة الدنيا.. وده عشان هو كان بطل حقيقي.. هتسألني ليه، هقولك عشان بسبب عزيمته وإصراره ده، فمحطة الفضاء الروسية مير Mir دي، فضلت عايشة، واتطورت فيما بعد عشان تصبح النواة الأولى لأعظم حاجة حصلت في تاريخ التعاون الدولي لغزو الفضاء.. الحاجة دي كانت محطة الفضاء الدوليةInternational Space Station أو ال ISS..

والأدهى من كل ده إنه كان متواضع جدًا، وبيصر إنه معملش حاجة وإن ده كان واجبه مش أكتر.. وبسبب ده، تم إعتباره بطل روسي حقيقي.. وبعدها رجع للفضاء تاني في مهمة تاريخية، كأول رائد فضاء روسي يسافر للفضاء على متن مكوك من تصميم وكالة ناسا NASA الأمريكية، بعد انتهاء الحرب الباردة أخيرًا.. وكمان بعدها طلع لمحطة الفضاء الدولية أو ال ISS، كأول رائد فضاء روسي عليها، هو والأمريكي روبرت كابانا Robert Cabana 😀

وفي خلال حياته بعدها، سيرجي كريكالوف سجل رقم قياسي للوقت اللي قضاه في محطة الفضاء، يقدر بحوالي 803 يوم، و 9 ساعات، و 39 دقيقة!!.. ومنهم 41 ساعة و 8 دقايق قضاهم بره المحطة، سابح في وسط الفراغ اللانهائي، وهو بيصلح حاجات أو بيعمل مهمات سير في الفضاء Space Walks روتينية!!

تخيل أنت الراجل ده حس بأيه، وهو بيتفرج على الكوكب بتاعنا من بره.. تخيل أيه اللي كان ف دماغه، وهو شايف المشهد المسالم الجميل ده، من الفراغ المظلم.. غير مهتم بكل الحروب والصراعات والثورات والإنقلابات اللي كانت بتحصل على السطح.. عشان حسب كلامه؛ من الإرتفاع ده كل حاجة مهما كانت كبيرة، بتبان تافهة ومالهاش لازمة ❤

وفي الآخر، بعد كل ده، وبعد ما الراجل قضى أكتر من سنتين ونص من عمره في الفضاء وبيتفرج ع الكوكب من بره، لسه في ناس بتقولك الأرض مسطحة ومفيش فضاء 😀

ولو المقال عجبك، متنساش تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في الكومنتات👇

الشير بيعبر عن دعمك، وكمان بيساعد في نشر المجهود الكبير اللي ببذله في كتابة المقالات دي، وبيوصله لناس أكتر، ف متبخلش به لو شايف الجهد يستحق   ❤