رحلة الشباب و الرياضة إلي الاقصر وأسوان
بص بقي وركز معايا علشان هقولك هنا الزتونة من ساعة ما تحجز لحد ما ترجع بالسلامة من هناك، هتعمل ايه و هتحتاج تاخد ايه معاك و ممكن تاكل وفين و تتسوق فين حاجات كتير هشرحهالك هتسهل عليك كتير و تخليك تستمتع بكل لحظة في الرحلة.
حضرتك هتحجز للرحلة من موقع الوزارة ممكن تدخل عليه من هنا
موقع الوزارة
و تشوف الميعاد المفتوح للسفر هيكون امتي و تسجل في عن طريق ادخال بياناتك كلها كاملة و صحيحة، وتتأكد أن الشروط دي منطبقة عليك كلها:
- السن من 18حتى 40 سنة ولا يسمح باصطحاب أطفال نهائياً أو أسر.
- يتم استبعاد من سبق لهم الاشتراك في الرحلة بالموسمين الماضيين طبقا للرقم القومي المسجل على موقع الوزارة.
- ارتداء الكمامة الطبية إلزامي لجميع المشاركين في الرحلة بداية من استقلال القطار وفي جميع خطوات ومزارات البرنامج وأماكن الإقامة ووسائل الانتقالات الداخلية وحتى العودة بالقطار.
- يتم توقيع الكشف الطبي للمشاركين بمعرفتهم وعلى نفقتهم بما يفيد خلوهم من أمراض القلب والجهاز التنفسي والصرع والأمراض المعدية والمزمنة (الكشف الطبى يكون من اى مستوصف حكومى او خاص)
- يتم تسليم أصل الكشف الطبي وصورة بطاقة الرقم القومي بالمديرية أثناء سداد اشتراك الرحلة.
- يتم الحجز عن طريق الموقع الإلكتروني للوزارة بعد الاطلاع على الشروط والموافقة عليها والتوقيع على الإقرار ولا يعتبر الحجز نهائياً إلا بعد السداد بالمديرية.
- قيمة الاشتراك للبنين (800) جنيهاً للفرد الواحد تسدد بمديريات الشباب والرياضة بالمحافظات وذلك بأسبقية السداد بالمديرية وليس بأسبقية التسجيل على الموقع.
- قيمة الاشتراك للفتيات (1000) جنيهاً للفرد الواحد تسدد بمديريات الشباب والرياضة بالمحافظات وذلك بأسبقية السداد بالمديرية وليس بأسبقية التسجيل على الموقع.
- يتم التوريد بالمديريات من الساعة التاسعة صباحاً حتى الثانية ظهراً من الأحد إلى الخميس مع استبعاد الأعياد والعطلات الرسمية.
- لا يجوز تبديل المشترك بآخر نهائيا ولا يتم رد قيمة الاشتراك في حالة التغيب عن الرحلة.
- التجمع لرحلة الذهاب بالقطار من محطة مصر بالقاهرة اعتباراً من الساعة الثالثة والنصف عصر يوم الخميس والتحرك للعودة مساء يوم الأربعاء التالي.
- تدعم وزارة الشباب والرياضة تكاليف الإقامة والإعاشة والانتقالات ورسوم زيارة الأماكن السياحية المدرجة بالبرنامج.
- يحق للوزارة إجراء أي تعديل أو تبديل أو حذف بالبرنامج أو أماكن الإقامة طبقاً للظروف الطارئة وتوجيهات مسئولي هيئة الإشراف بالوزارة.
- يحق لهيئة الإشراف بالقطار إجراء أي تعديل أو تبديل بالأماكن المخصصة لأي من المشاركين بالقطار (رقم العربة ورقم المقعد) أو أماكن الإقامة أو البرنامج طبقاً للظروف الطارئة ومتطلبات التنفيذ.
- يجب التأكد من صحة البيانات قبل الحفظ، حيث لا يمكن تعديلها بعد ذلك
انت كدا حجزت لكن مش حجز مؤكد لازم تاني يوم او يوم الحجز علطول تروح مديرية الشباب و الرياضة في محافظتك وتدفع رسوم الحجز و تاخد رقم كرسي في القطار، قبل ما تروح المديرية تروح اي وحدة صحية تقولهم عايز شهادة خلو من الامراض ب ٢٠ جنيه و هتاخدها معاك وانت رايح و صورة بطاقة و طبعا مبلغ الحجز اهم حاجة😂
اخدت رقم الكرسي في القطار انت كدا تمام تجهز شنطتك بقي ياريس وبالنسبة للبنات دي اكتر رحلة امان ممكن تتخيلوها طبعا القطار خاص بالشباب و الرياضة فقط يعني مش هتلاقي حد تاني بيركب معاك القطر، ميعاد تحرك القطار اللي هيقولولك عليه وانت بتحز تكون في المحطة قبله بنصف ساعة علي الاقل علشان تعرف فين الرصيف اللي القطر هيتحرك من عليه و تاخد راحتك في الحركة و كمان تتعرف علي شباب من اللي طالع معاك خصوصا لو طالع لواحدك لان الغرفة بيقعد فيها اربع افراد علشان كدا لازم تتعرف و تكون صداقات في القطار انت معاك حوالي ٨ ساعات عيش فيهم بقي و اتعرف علي اصدقاء جداد، طبعا القطار مش بيستني حد ف الناس الكاسولة هتندم لو القطار اتحرك و سابهم لانك هتسافر علي حسابك.
تاخد ايه معاك في رحلة الشباب و الرياضة
بلااااش شنطة السفر بتاعة الحج الله يكرمك انت مش مهاجر دا كلها ٦ ايام و راجعين وكلامي دا للبنات تحديداً، شنطة الظهر ممتازه جدا وهتخليك خفيف في الحركة ومش هتتعبك في الشيل وهتكفي بالغرض جدا، إتاكد من شنطتك انها سليمة بدون قطع او علي وشك القطع علشان هتتسوح حرفياً لو اتقطعت منك، طب هتاخد ايه في الشنطة هو جاكت واحد فقط فقط فقط هتلبسه بالليل و في القطر بالليل بردو علشان الجو بيكون برد شوية بالليل لكن طول النهار هتبقي لابس صيفي، معجون اسنانك فرشتك صبونتك وكريم للشمس لو بتخاف علي بشرتك، ترنج للنوم و ٣ تيشرت نص كم و واحد بنطلون خروج وانت لابس واحد مسافر بيه يبقي كدا فل اوي هدوم داخلية بقي علشان هتستحمي كل يوم من الحر و العرق، متملاش الشنطة علي الاخر علشان هتشتري حاجات من هناك سيب ربع الشنطة فاضي، خد معاك سندوتشين و عصير و مياه علشان المشوار طويل في القطار ومش هتنام من الهيصة لذلك اعمل حسابك في أكل يكفيك للصبح.
وصلت بالسلامة، هتتسكن انت و اصحابك كل ٤ في غرفة تطلع تغير و تريح شوية لانك منامتش طول الليل طبعاً لحد ميعاد الغدا هتنزل تستلم بون الغدا ليك انت واصحابك اللي معاك في الغرفة وتروح المطعم علشان تتغدي، الاكل مش احسن حاجة لكن هيفي بالغرض جدا وهيكفيك اتغديت بآلف هنا يا سيدي تطلع تتمشي كدا في المكان و تتعرف عليه و تتعرف علي الخدمات الموجودة فيه علشان لو احتاجت حاجة تبقي عارف هتجيبها من فين ولو من الناس اللي بتحب تشرب قهوة او شاي اكيد لازم تطلع تتعرف علي المكان علشان تشوف قهوه تبقي تقعد عليها.
تعالي بقي اقولك سر مهم جدا 😉 لو الشباب هتقعد في مبني التعليم المدني في ورا المبني دا جبل بالليل تاخد اصحابك و ازازتين مياه وتطلع الجبل تسهر عليه انت و الصحاب وادعيلي يا ريس علشان مش هتنسي اللمه و السهرة دي ابدا ولو قاعدين في بيت الشباب اطلع واسئل فين مركز التعليم المدني وروح اسهر بردو مش هتندم هو المكان قريب مش بعيد هتتمشاها.
برنامج رحلة الشباب و الرياضة للأقصر و أسوان
البرنامج بيتم وضعة من المشرفين هيروحو فين و يعملو ايه يعني انت مش هتشيل هم حاجة خالص يومك كله هيكون مليان بداية من تاني يوم للوصول الصبح هتزور مكان او اتنين حسب الوقت و بعد الغدا هتروح مكان تاني وبالليل هتبقي جولة حره متشتريش حاجة اول ٣ ايام اسئل عن الاسعار لحد ما تبقي عرفت الدنيا فيها ايه و الاسعار ايه وساعتها هتقرر تشتري من مين لآن الاسعار متفاوتة جدا، التزم بمواعيد الباص علشان تستمتع و ميحصلش مشاكل او حد يتضايق منك انك اخرتهم لان حرفيا الدقيقة بتفرق جدا، اعرفلك كرسي في الباص وكل مره اركب فيه علشان متوهش نفسك، خلي معاك دائما زجاجة مياه لان الجو حر ولو هتشتري من المزارات السعر غالي.
في الغالب بيكون البرنامج ٣ ايام الاقصر و ٣ ايام اسوان، خلينا الآول في ال ٣ بتوع الاقصر انت تقريبا هتروح معظم المزارات مع الجروب اللي هي ” معابد البر الشرقي – معابد البر الغربي – جزيرة الموز – الصوت و الضوء بمعبد الكرنك – جولة حرة في السوق و المدينة ” الحاجات اللي ممكن تعملها زيادة انك تحجز منطاد وتكون منسق مع المشرف علشان بتتحرك من المكان قبل شروق الشمس وتحضر الشروق في المنطاد، لما تنزل جولة حره اتجول في المدينة كلها و في الشوارع متكتفيش بالسوق فقط اتمشي وسط البلد و اهلها بس اهم حاجة تبقي حافظ الطريق اللي هتمشي فيه علشان تعرف ترجع، المكان اللي فيه السكن في قرية الطود و المكان دا بعيد ف حاول متتخلفش عن ميعاد الباص و الرجوع ابداً.
بعد كدا هتروح أسوان هواها يرد الروح و المشي علي الكورنيش ممتع جدا و ممكن تحجز انت واصحابك مركب في النيل هيكون متعة، لما تروح النوبة هتدخل بيت المشرفين بيبقوا مظبطين معاه ممكن تقعد فيه او تقعد في مكان تاني براحتك، النوبة ” غرب سهيل ” صغيرة جدا لذلك لفها كلها واتصور كتير هناك و في جبل في ظهر البيوت المنظر من عليه تحفة جدا
لو هتبقي ساكن في المدينة الشبابية في اسوان فهي في وسط البلد ممكن تنزل مع اصحابك من غير الباص تنزل بدري شوية و تطلعو جبل أبو الهوا الصور من فقوق روعة، كمان لما تروح السد العالي التزم بالتعليمات اللي هيقولك عليها المرشد و لما تروح رمز الصداقة اقطع تيكت علي حسابك ب ٢٠ جنيه و اطلع فوق المنظر خطير جدا و رائع و هتاخد فيه شوية صور تجنن.
أتسوق من فين في الأقصر و آسوان
بص يا سيدي زي ما قولتلك قبل كدا اول ٣ ايام متفكرش تشتري حاجة لحد ما تعرف الاسعار، لو هتشتري عطارة بلاش تشتري من النوبة علشان غالية في واحد الوزارة متعاقدة معاه وبيبيع باسعار حلوة، لو هتشتري فسيخ او ملوحة يبقي تجيب من اسوان محل اسمه السد العالي لو هتشتري تحف و تماثيل متشتريش من المزارات اشتري من السوق و فاصل اوي فاصل جدا لانهم بيطلبو في الحاجة ٥ اضعاف السعر يكفي اقولك الحاجات اللي طلب فيها ٦٠٠ جبتها ب ٢٥٠ جنيه.
نصائح مهمة لرحلة سعيدة
- استمتع / ي بكل لحظة هناك ال ٦ ايام دول هيفصلوك عن الدنيا و حرفيا مش هيتكررو تاني
- اتعرف / ي علي اصدقاء جداد لان دي احلي حاجة حرفياً في الرحلة ” البنات بطلو نفسنه وخليكوا لذاذ مع بعض “😂
- المشرفين فرفوشين جدا وهدفهم الاول و الاخير انك تتبسط بلاش تزعل حد منك و خليك ملتزم بالتعليمات
- اهل المدينة ناس سكره اتعرف عليهم و اتصاحب عليهم و اتصور معاهم هما بيحبوا الزوار جدا وبيسئلوا عن ميعاد الرحلات و في انتظاركم لما تروح هناك هتشوف السياحة مضروبة ازاي فبلاش تفاصل في العطارة و الإكسسوارات لكن التحف فاصل عادي😂
- وانت في السوق اعمل حركة رواج في المكان اشتري فاكهة و اشتري لب و سوداني و اشتري اكسسوارات
- لو هتاكل في مكان دور علي مكان مضمون لو انت في اسوان كل في ماك المكان روعة و الفيو خطير وانت قاعد علي النيل
بس كدا يا شباب يارب يكون الموضوع افادكم و تروحوا و ترجعوا بالسلامة ولو حد عنده اي سوال يسيبه في كومنت و انا هرد عليه، ولو الموضوع افادك متبخلش عليه بالشير علشان الكل يستفاد.
