ما تيجي أحكيلك حاجة غريبة ومبهرة..
شايف الصور اللي قدامك دي؟ 👇
دي مخطوطة أثرية يقال إن كاتبها كائن فضائي، وإن أصلها مش من كوكب الأرض أصلًا، وتعتبر واحدة من أكبر الألغاز الموجودة حاليًا في القرن الواحد والعشرين!!
تعالى أحكيلك الموضوع برواقة، ومتنساش كوباية الشاي بالنعناع الحلوة ❤☕
بص يا عم.. المخطوطة اللي أنت شايف صور منها تحت دي 👇
إسمها مخطوطة فوينيتش The Voynich Manuscript.. ودي اتشهرت لأول مرة من أكتر من قرن فات، تحديدًا سنة 1912 لما اشتراها جامع الآثار والأنتيكات الأمريكي ذو الأصل البولندي (ويلفريد فوينيتشWilfred Voynich)، وبدأ يعرض اللغز المستخبي جوه صفحاتها للعالم..
المخطوطة دي محدش عارف أصلها بدأ فين بالظبط، لكن اللي بيعتقدوه إنها اتكتبت في وقتٍ ما من القرن ال 14، في أوروبا وغالبًا إيطاليا.. الوقت بالتحديد حسب دراسة للكربون الموجود في الصفحات، قامت بيها مؤسسة مكرون البحثية McCrone Research Institute في شيكاجو، كان ما بين سنة 1404 و 1434.. وكمان المواد اللي تم استعمالها في الكتابة على الصفحات كانت شائعة وقتها في العصر ده..
طب هو أيه اللي مكتوب فيها ده، وأيه الرموز الغريبة والرسومات المذهلة دي؟!
هو ده بقى يا سيدي اللغز.. عشان محدش عارف أي حاجة من اللي مرسوم ف الصفحات ده.. وحتى اللغة اللي مكتوبة بيها المخطوطة مالهاش مثيل إطلاقًا في تاريخ كوكب الأرض كله!!.. لدرجة إنها لما خدت إهتمام عالمي سنة 1912، تم عرضها على أشهر خبراء في فك الرموز والشفرات في العالم، خلال الحرب العالمية الأولى والتانية، ومفيش حد فيهم عرف يفك لغز حرف واحد جواها!!
ناس تقول اللغة الغريبة اللي مكتوبة أصولها بترجع للغة العربية القديمة جدًا، أو الأرامية أو العبرية.. وناس تانية تقول دي لغة بروتو رومانية قديمة، اللي هي أتطورت فيما بعد للغة الأسبانية والبرتغالية الحديثة.. بس بردو محدش فيهم فاهم حاجة!! 😅
طب أيه اللي في الصفحات ده؟!
المخطوطة دي متكونة من حوالي 240 صفحة.. وخد المفاجأة بقى.. معظم الصفحات مرسوم فيها أنواع من النباتات لا تنتمي لكوكب الأرض أصلًا، ومفيش عالم نباتات واحد قدر يتعرف عليها أو على فصيلة قريبة ليها حتى!!.. ده غير كمان إن مرسوم في المخطوطة شوية خرائط نجمية Star Cards 👇
والمذهل بردو إن الخرائط النجمية دي لا تنتمي لكوكب الأرض، وعلماء الفلك مشافوش زيها قبل كده!!
المخطوطة كلها عمومًا متقسمة ل 6 أقسام.. القسم الأول فيه رسومات لحوالي 113 نوع نباتات غريب وغير موجود على كوكب الأرض.. والقسم التاني فيه رسومات وخرائط نجمية وفلكية ورسومات لعلامات الأبراج زي القوس والكور، وكمان رسومات لبنات عارية طالعين بجسمهم من أنابيب غريبة !!
القسم التالت فيه رسومات غريبة لإناث عاريات بردو، وبطونهم كبيرة زي ما يكونوا حوامل، وبردو ظاهرين طالعين من أنابيب وبيتعاملوا مع كبسولات غريبة، وبيستحموا في سوائل أغرب ..
القسم الرابع فيه أشكال لميداليات كونية غريبة، مرسومة بأشكال جغرافية معينة مالهاش معنى واضح، والقسم الخامس فيه رسومات لأكتر من 100 نوع مختلف من النباتات الطبية الغريبة الغير معروفة بالنسبالنا على الكوكب، محطوطة في أوعية غريبة لونها أحمر وأزرق وأخضر..
والقسم الأخير فيه كتابة طويلة باللغة الغريبة دي محدش فاهم معناها.. وفي كل صفحة في رسمة لورود شبه النجوم كده، جنب الكلام الغريب!!
فاهم حاجة؟! ولا أنا فاهم وحياتك😅
عايز أقولك إن لغز المخطوطة دي دوخت باحثين كتير من زمان ولحد وقتنا هذا محدش فاهم أيه اللي مكتوب فيها ده، وأيه خرايط النجوم الغريبة دي، وأنواع النباتات اللي مش موجودة على الكوكب دي.. ومن هنا بقى بدأت نظرية غريبة ومخيفة شوية..
نظرية بتقول إن اللي كتب المخطوطة دي هو في الواقع رائد فضاء من عالم آخر، المركبة بتاعته تعطلت وفضل عالق على كوكب الأرض مش عارف يرجع لموطنه.. وعشان كده كتب الكتاب ده كنوع من المذكرات أو الإرشادات عن شكل الطبيعة على الكوكب بتاعه مقارنة بالتجارب بتاعته على كوكبنا إحنا!!
المشكلة إن اللغة اللي مكتوب بيها المخطوطة حسب الدراسات اللي اتعملت عليها، مكتوبة بحرية كاملة Freely Written، يعني مش مرسومة زي الرموز.. لأ مكتوبة بسرعة زي ما بنكتب عربي وإنجليزي كده.. يعني اللي كاتبها كان عارف كويس اللغة اللي هو بيكتب بيها، ومكانتش لغز بالنسبة له، على الرغم من إنها تعتبر لغز بالنسبالنا احنا، عشان هي جاية من حضارة غير معروفة بالنسبالنا في التاريخ!!
ف إزاي بقى؟!.. يعني هل ممكن نشطح بخيالنا أكتر ونقول إن اللي كاتب المخطوطة دي جاي من عالم موازي فيه حضارات غير معروفة بالنسبالنا على الأرض، وعندهم لغات مشتركة مع لغاتنا القديمة في الأساسيات، لكن مختلفة عنها في الشكل؟!
عالم موازي فيه ناس شبهنا، بس عندهم نباتات ونجوم مش عندنا ومش شبه اللي بنشوفها في السماء بتاعتنا خالص!!
كلها نظريات وافتراضات عمالة تتحط بقالها أكتر من قرن.. وطول المدة دي محدش عارف يوصل لإجابة شافية أو يكسر لغز اللغة الغريبة اللي مكتوبة بيها، برغم ان المخطوطة من كتر ما هي لغز، اتحطت بالكامل أونلاين في مواقع بحثية عشان الناس تحاول تفك شفرتها.. وبعدها طلع نظريات كتير منها مثلًا إن الكتاب هو كتاب طبي بيوصف العلاج بالاستحمام وما شابه.. بس بردو مفيش حد قدم دليل أو فك لغز اللغة!!
ف أنت رأيك أيه؟!
شايف إن المخطوطة دي ليها تفسير أرضي طبيعي، وإن اللغة المكتوبة بيها ممكن تكون جاية من حضارة مفقودة من عندنا هنا على الأرض، ولا بتميل أكتر للتفسير الخوارقي اللي بيقول إنها من أصل غير أرضي، وإن اللي فيها ده كله لا ينتمي لحضارة كوكب الأرض كما نعرفها؟!
هسيب الإجابة لخيالك.. ولو الموضوع عجبك، متنساش تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في الكومنتات 👇
الشير بيعبر عن دعمك، وكمان بيساعد في نشر المجهود الكبير اللي ببذله في كتابة المقالات دي، وبيوصله لناس أكتر، ف متبخلش به لو شايف الجهد يستحق ❤
