صباح الخير او مساء الخير حسب ما انت بتقراء الموضوع 🙂
لو انت لسة جايب كاميرا جديده طبعا مبروك الاول
لاكن يؤسفني اني اقولك انك هتتصدم من اول صورة هتصورها بيها …. بجد مش بهزر
ناس كتير جدا بتشتري الكاميرا الـ DSLR او ما يطلق عليها بالكاميرا الاحترافية
ومنتظر منها ان اول ما يصور بيها تطلع صور ينزلها علي الفيسبوك الناس تشوفها تتوهم !!
للأسف كلنا كنا هذا الشخص متفكرش ان انت حاله غريبة 🙂
الموضوع اكبر من مجرد شراء كاميرا احترافية .. الموضوع محتاج دراسة ثم تعلم ثم تعلم ثم تعلم
زي اي مشروع في الدنيا محتاج تصرف عليه وتنميه وتكبره علشان توصل لمرحلة المنافسه
قبل ما تشتري الكاميرا وترمي فلوس علشان عايز تبقي مصور مشهور و زي الواد ابن خالتي كراويا اللي مكسر الدنيا وجايب عربية و هيتجوز و….. الخ من التصوير .
انت بجد محتاج تفكر في الحاجات دي ؟
انت بتحب التصوير !
تقريبا 90% من البشر بيحب التصوير
يبقي انت محتاج تحدد مقدار حبك للتصوير اد ايه
هل لو فشلت ومقدرتش تبقي زي ابن خالتي كراويا اللي مكسر الدنيا بالكاميرا هتتخلي عنها ولا برضو هتحتفظ بيها وهتصور مش هتتوقف عن التصوير ؟
لو الاجابه هتبيعها …. يبقي نصيحة مترميش فلوسك في الارض
وكفايه عليك لحد كدا في الموضوع متكلمش قراءة 😀
طب الاجابة هخليها لأن انا بحب التصوير جدا جدا …..
كدا يبقي ندخل علي المرحلة التانيه
انت بتحب تصور ايه ” مناظر طبيعيه – حيوانات – اشخاص – منتجات – حياه صامته …… الخ “
حاول تعرف ميولك رايح فين علشان تقدر تحدد هدفك وتشوف انت محتاج ايه ؟؟
حاول تعرف ميولك رايح فين علشان تقدر تحدد هدفك وتشوف انت محتاج ايه ؟؟
واحد هيقول والله انا بحب الصور كل حاجة و أي حاجة وعايز صورة تطلع حلوة ونقيه
كلام جميل يبقي انت محتاج اقل فئة في الكاميرات الاحترافية وتتعلم عليها كويس هتطلع صور تذكارية جميله جدا تحتفظ بيها
طب انا بحب الصور الطبيعة و والجمال الطبيعي !!
طب انا بحب الصور الطبيعة و والجمال الطبيعي !!
يبقي حضرتك محتاج فئة متقدمة قليلا مع شوية فلاتر حلوين علشان ظروف التصوير المختلفة
طب لا انا عايز اشتغل واكسب من ورا الكاميرا انا مش جايبها هواية وبس انا جايبها للشغل .!!
انت بقي اللي عليك الكلام اللي جاي دا كله 🙂
انت محتاج كاميرا احترافية فئه عالية شويه تديلك اوبشن تحكم كتير علي سبيل المثال مثلا D7000 او D7100 او اعلي علي حسب امكانياتك
كدا انت عرفت الكاميرا اللي هتحتاجها
محتاج كمان تحدد هتشتغل ايه في مجال الشغل التجاري …؟؟؟؟
هتشتغل تصوير منتجات و دعاية واعلان
يبقي حضرتك محتاج معدات اضاءة محترمة وتجهيز مكان يكون استوديو وتقدر تصور فيه المنتجات دي
ومحتاج التعامل بشكل جيد جدا مع برنامج معالجة الصور مثل الفوتوشوب
محتاج كمان تتعلم كتير تتدرب كتير علي الاضاءة و الزوايا محتاج تجرب كتير جدا علشان تطلع بالصورة المطلوبة
الحاجة الكويسة في الموضوع دا ان انت بتصور منتج ثابت ومعاك وقت تجرب براحتك علشان تطلع بأجمل صورة
طب لا انا بحب تصوير الافراح …. ااااه انت هنا بقي قررت تدخل عش الدبابير 😀
اولا لازم تعرف حاجة مهمة جدا ان السوق ما شاء الله بقي فيه ناس كتير جدا في المجال دا تحديدا وانه انتشر بشكل واسع جدا
اولا لازم تعرف حاجة مهمة جدا ان السوق ما شاء الله بقي فيه ناس كتير جدا في المجال دا تحديدا وانه انتشر بشكل واسع جدا
طب دي حاجة حلوه ولا وحشة !!
بالطبع حاجة ممتازة لانه فتح الافاق لمنافسة شرسة جدا في الافكار و الابتكار للحصول علي مشهد رائع
طيب جميل يعني انا كدا محتاج ايه ..؟
محتاج كاميرا فئة عالية برضو شويه زي اللي انا ذكرتهم فوق او اعلي حسب امكانياتك
محتاج عدسات علشان ظروف التصوير المختلفة
محتاج وحدات اضاءة اوت دور ” وركز علي اوت دور دي اوي “
لانك مش هتصور في مكان ثابت انت متنقل من مكان لاخر يبقي انت محتاج شغلك كله هيكون علي بطاريات
محتاج اكثر من كارت ميموري علشان تأمن نفسك ” انا شخصيا بعتبر تصوير الافراح من اصعب انواع التصوير واكثرها خطورة ”
لأن اللحظة اللي بتعدي مبترجعش تاني انت في سلسلة احداث متتالية بشكل سريع جدا ومطلوب منك تخطف لقطات تخلد الذكري دي
يوم الفرح هو اهم يوم في حياة كل شاب او شابة لذلك لازم تكون متمرس بشكل جيد جدا قبل ما تقرر تطلع تصور فرح
يوم الفرح هو اهم يوم في حياة كل شاب او شابة لذلك لازم تكون متمرس بشكل جيد جدا قبل ما تقرر تطلع تصور فرح
محتاج تكون محترف او علي الاقل تعرف شخص محترف في مجال الجرافيك علشان معالجة الصور
تقريبا كلنا عندنا بعض العيوب او الندبات في الوجه او غيره
كل الحاجات دي لازم تتعالج لان مطلوب منك تطلع صورة تبهر العروسين
” ملحوظة :: في ناس بتفهم معني معالجة العيوب دي انها تمسك الوجه وتخليه زي الصابونة مش باين منه معالم ..!!!
الكلام دا غلط جدا انت لازم تبين كل التفاصيل وتخبي كل العيوب وان شاء الله هنتكلم في الموضوع دا في تدوينة منفرده توضح ايه اللي مطلوب منك تعمله في صور الزفاف “
وكدا اكون خلصت شوية الكلام اللي عندي في الموضوع دا 🙂
واتمني الموضوع يفيد وتفكرو كويس جدا قبل شراء الكاميرا علشان مترجعش تندم
