فاكرين صورة الثقب الأسود:
اللي صورها التعاون العالمي اللي اسمه تليسكوب أفق الحدث Event Horizon Telescope لأول مرة في التاريخ سنة 2019؟.. أهو نفس التعاون العالمي ده أعلن عن صورة جديدة بدقة أعلى بكتير، لنفس الثقب الأسود، هي اللي انتوا شايفينها قدامكم دي
الصورة دي للثقب الأسود العملاق Supermassive Black Hole اللي في قلب مجرة M87، وهي تم التقاطها من خلال حاجة اسمها الضوء المستقطب Polarized Light.. بمعنى إنه تم تمرير الضوء من خلال فلاتر معينة عشان تزود دقته، وبالتالي لأول مرة ظهر قدامنا منظر الحقل المغناطيسي Magnetic Field الهائل بتاع الثقب الأسود، هو اللي باين ف الخطوط اللي ف الصورة دي 
عشان تتخيل مدى عظمة التعاون العالمي اللي اتعمل عشان الصورة دي تتلقط، فيكفي إني أقولك إن ال Collaboration بتاع تليسكوب أفق الحدث بيضم فريق عالمي من أكتر من 300 عالم مشهور من علماء الفضاء، وهما عاملين شبكة ضخمة من 8 تليسكوبات شديدة التطور متوزعة ف 8 دول في العالم، عشان كلهم يشكلوا عدسة أو Lense وهمية حجمها قد كوكب الأرض كله، تقدر تصور بدقة تخلينا نشوف ونعمل زووم بدقة Full HD على الأرقام اللي مكتوبة على البطاقة الشخصية أو الكريديت كارد بتاعتك، لو هي محطوطة على سطح القمر!! 
طبعًا الصورة دي هتفتح الطريق قدام علماء الفيزياء الكونية عشان يفهموا طريقة عمل الحقول المغناطيسية الضخمة اللي بتنشأ من قلب الثقوب السوداء، وبتمتد لمسافات أكبر من حجم المجرة كلها.. وده بدوره هيدينا معلومات ندرسها، أكتر بكتير من اللي كان متاح قبل كده، حتى بالصورة القديمة بتاعت 2019..
متع عينك بالصورة اللي مكانش في بشري يحلم إنه يشوفها على الحقيقة في العصور اللي فاتت، واللي جه علماء عظام أمثال أينشتاين وماكس بلانك ونيلز بور وشرودينجر وستيفن هوكينج وقدموا كتير لعلم الفيزياء النظرية عشان يخلونا نقدر نتخيلها، وكلهم ماتوا قبل ما يشوفوها رأي العين.. اللي قدامك ده مش بس شكل الضل أو ال Shadow بتاع ثقب أسود حقيقي بدقة عالية لأول مرة في التاريخ.. لأ ده شكل الطموح والتطور البشري لما بيوصل لحدود المستحيل 
ولو الصورة عجبتك، إعمل منشن لصحابك المهتمين بالحاجات الحلوة دي عشان يقرأوا معاك البوست ويشوفوا الصورة، وكالعادة متنساش تعمل شير دعمًا للمجهود
بقلم: محمود علام
ولو عايز تشوف المصدر إضغط علي الرابط
