ما تيجي أحكيلك حاجة ظريفة؟..
تعرف إن أغنى رجلين في العالم دلوقتي ماسكين ف خناق بعض قدام لجنة الإتصالات الفيدرالية ف أمريكا، عشان بيتخانقوا على مين اللي يستولي على مدار الأرض المنخفض عشان يحط فيه الأقمار الصناعية بتاعت الإنترنت؟ 😃
الراجلين دول هما أيلون ماسك Elon Musk صاحب ومؤسس شركة تسلا Tesla و Space X، وأغنى رجل في العالم حاليًا، بعد ما عدى خصمه التاني، والراجل اللي عامل معاه الخناقة اللي هو جيف بيزوس Jeff Bezos، صاحب ومؤسس مجموعة شركات أمازون Amazon وشركة تكنولوجيا الفضاء والصواريخ Blue Origin..
طب الخناقة على أيه يا عم علام؟.. هات كوباية الشاي والنعناع وتعالى أحكيلك ☕❤
بص يا عم.. أنت عارف إن الحج إيلون ماسك بقاله فترة شغال على مشروع الإنترنت الفضائي بتاعه، واللي اتكلمت عنه قبل كده كتير، اللي هو كان إسمه Starlink.. المشروع ده بيهدف لإنه يطلع حوالي 12 ألف قمر صناعي صغير في مدار الأرض فوق، عشان يوفروا شبكة إتصالات وإنترنت فائقة السرعة، وأسرع من اللي عندنا حاليًا بأضعاف مضاعفة.. وكمان بسعر رخيص.. وكمان تقدر توصل لأي مكان في العالم بدون مشاكل، عكس الإنترنت الطبيعي اللي بيواجه مشاكل لما الحكومات بتحاول توصله في الأماكن الوعرة والبعيدة.
وفعلًا الراجل بقاله فترة طويلة شغال ع المشروع وبالفعل طلع أكتر من 1584 قمر صناعي لحد اللحظة دي.. وخد موافقات من لجنة الإتصالات الفيدرالية Federal Communications commission أو اللي بيسموها FCC، على إطلاق 4400 قمر.. ده غير إنه بيخطط زي ما قلتلك لإطلاق أكتر من 12 ألف قمر صناعي مستقبلًا ف مشروع Starlink..
بس مين بقى اللي غيران منه؟!
عمنا الأخ جيف بيزوس.. اللي لسه من يومين منزل إعلان إنه أخيرًا وبعد أكتر من 20 سنة على تأسيسها، هيسيب منصب ال CEO بتاع أمازون ويبقى رئيس مجلس الإدارة أو ال Chairman، وهيدي إدارة أعمال الشركة أو منصب ال CEO ده لشخص تاني، وده عشان يبعد عن الواجهة و يتفرغ لمشاريع تانية أكثر طموحًا.. أصل هو لقى الواد إيلون ماسك طالع بسرعة وحاطط عليه، وخد مكانه في قائمة أغنى رجل في العالم، وعامل معاه الجلاشة في تكنولوجيا السفر في الفضاء ونقل المعلومات.. ف قالك لأ.. أنا مش هسكت..
جيف بيزوس عامل شركة إسمها Blue Origin.. والشركة دي زي Space X بالظبط، بتشتغل على تصميم صواريخ ومكوكات فضائية متطورة، عشان تبدأ مستقبلًا حملة واسعة لتعدين المعادن النادرة من النيازك والكويكبات أو ما يسمى بال Space Mining، وكمان نقل البشر والمعدات الثقيلة للفضاء بتكلفة أقل من اللي بتعمله Space X بالفعل حاليًا بنجاح، ومحققة شراكات فيه مع وكالة ناسا NASA..
يعني الراجل ده خلاص وصل ليفيل الوحش، وقفل لعبة الحياة على الأرض، وحاليًا بيدور فوق ف الفضاء على طريقة تخليه أغنى راجل ف الكون بقى مش مجرد الكوكب..
ف لما شاف الفكرة بتاعت إيلون ماسك بتاعت الإنترنت الفضائي بدأت تنجح بشدة، لدرجة إنهم بالفعل بدأوا تشغيلها بشكل تجريبي مع عدد من الناس في كندا وأمريكا، قرر إنه هيعمل نفس المشروع، وسماه مشروع (أقمار كويبر الصناعية Kuiper Satellites Project)..
وبالفعل قدم مشروعة للجنة الإتصالات الفيدرالية، وقدر يحصل على موافقة إنه يطلق 3236 قمر صناعي حوالين الأرض عشان يشغل المشروع بتاعه..
طب فين المشكلة؟!
المشكلة إنه المشروع بتاعه هيطلع الأقمار الصناعية دي على ارتفاع قليل شوية، في مدار الأرض المنخفض أو Low Earth Orbit.. وده عشان يخلي الخدمة السحابية اللي هتقدمها أقوى وأسرع، عشان الإشارات مش هتسافر مسافة كبيرة.. وكمان عشان يقلل فرص إن الأقمار دي لو حصلها أي مشكلة تتدمر أو تتكسر وتضيف شظايا كارثية جديدة للشظايا اللي بالفعل موجودة حوالين الأرض بكميات ضخمة ممكن مستقبلًا تعمل مشكلة حقيقية لأي مركبة فضائية بتحاول تخرج من الكوكب..
طب لحد هنا الكلام حلو..
بس المشكلة بقى إن إيلون ماسك عيل ومبيحبش حد يبقى أحسن منه 😃 هتسألني إزاي، هقولك إنه راح وعمل طلب للجنة الإتصالات الفيدرالية إنه يشغل الأقمار بتاعته على إرتفاع منخفض أكتر من اللي هو كان مخططله في الأول.. وإداهم نفس الأسباب.. إحنا عايزين نوفر خدمة أحسن، وبنحمي الكوكب يا جماعة..
ف لما عمك جيف بيزوس سمع الحوار ده، إتجنن وراح قدم شكوى رسمية لنفس اللجنة، وقالهم إن الخطوة دي لو اتوافق عليها، ف هي هتتعارض مع مدارات المشروع بتاعه اللي هو بيخطط لإطلاقه ف خلال السنين الجاية، وممكن تحصل مشاكل وتصادمات ما بين الأقمار وبعضها في المدار بتاعها حوالين الكوكب.. وحتى لو محصلش، ممكن يأثروا على بعض بطريقة لاسلكية..
وأمازون طلعت تصريح رسمي بتقولك إنهم صمموا مشروعهم بشكل خاص عشان ميأثرش على مشروع Stalink ويبقى بعيد عنها تمامًا.. بس اللي بيعمله إيلون ماسك حاليًا هيتسبب في مشاكل مستقبلًا للمشروعين وهيأثر على العملاء بسبب التداخل ما بين إشارات الأقمار، وعلى المشروع نفسه كمان في حالة حدوث تصادمات بين الأقمار..
ف طلع إيلون ماسك ونزل تويتة كيادة كده، و Thug Life أوي ف نفسها.. قالك إن الناس مش هتستفيد حاجة لو إحنا كتفنا مشروع Starlink دلوقتي، عشان نظام أقمار صناعية من أمازون لسه افتراضي وعلى الورق كله، وقدامه سنين على ما يدخل مرحلة الإطلاق والتشغيل.. واللي عنده معزة يربطها 😎
هتلاقي التويتة تحت ف أول كومنت 👇 برنس ف نفسه والله 😃
وحاليًا الإتنين عاملين خناقة كبيرة مع بعض ع السوشيال ميديا، ومقدمين شكاوي رسمية للحكومة الأمريكية ولجنة الإتصالات، والموضوع بيوسع جامد وشكلها هتقلب عركة وهتطير فيها رقاب..
ف تخيل أنت.. تخيل الناس دي بتتخانق على أيه، وطموحاتها أيه في المستقبل، وإحنا لسه عايشين فين وبنفكر ف أيه..
تخيل إنهم عاملين المشاكل دي مع بعض، وبيتنافسوا بالضراوة دي على مشاريع ممكن في المستقبل تفتحلهم باب لثروات عمر ما كان في بشري يحلم بيها منذ فجر التاريخ وبداية الحياة على الكوكب.. وإحنا هنا لسه بنتخانق مع مدام عفاف بتاعت الإتش آر على مرتب الشهر 😃
تاني بقولك.. الحياة ليست عادلة يا صاحبي..
المهم.. لو الموضوع عجبك، متنساش تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في الكومنتات 👇
الشير بيعبر عن دعمك، وكمان بيساعد في نشر المجهود الكبير اللي ببذله في كتابة المقالات دي، وبيوصله لناس أكتر، ف متبخلش به لو شايف الجهد يستحق ❤
بقلم الكاتب: محمود علام
و دي المصادر لو عايز تفاصيل أكتر
