تعالى أحكيلك على حوار غريب شوية.. عمرك كنت تتخيل ف يوم من الأيام إن ييجي عالم فيزياء نظرية، ويقولك إحنا اكتشفنا وبالدليل إن في كون موازي الزمن فيه بيمشي بالعكس ؟!!
مش مصدق؟!! طب إعمل كوباية الشاي بالنعناع اللي بقت الماركة المسجلة بتاعتي خلاص، وتعالى أحكيلك ايه الموضوع ده بالظبط
بص يا سيدي.. وكالة ناسا N.A.S.A الأمريكية لأبحاث الفضاء أعلنت عن اكتشاف جديد خارق للطبيعة، هيغير كل مفاهيمنا الحالية عن الكون والعالم والفضاء وعلم الفيزياء نفسه..
الإكتشاف ده يا سيدي جه من (أنيتا ANITA).. سامعك بتسألني مين أنيتا دي، وسامعك ياللي بتروش وبتسأل أنيتا جوتنبرج بتاعت التجربة الدنماركية.. لااااااا يابو لسان طويل إسحب منه الحاجة الساقعة يابني
أنيتا ANITA دي هي عبارة عن جهاز بيستعمله علماء الفيزياء النظرية اللي شغالين في أنتاركتيكا في القطب الجنوبي، وهي إختصار لجملة (هوائي انتاركتيكا الدافع العابرAntarctic Impulsive Transient Antenna )
ايه بقى الموضوع ده كله؟!!..
ده يا سيدي عبارة عن جهاز بيستعمله العلماء دول للبحث عن جسيمات ذرية وكمية متناهية الصغر، إسمها جسيمات النيوترينو Neutrinos..
إيه بقى النيوترينو دي باختصار؟!..
وهي عبارة عن جسيمات ذرية متعادلة الشحنة، اتكونت من زماااااان أوي من ساعة الإنفجار الكبير Big Bang، ومازالت لحد دلوقتي بتتكون من تفاعلات ذرية شديدة الطاقة High Energy في الشمس مثلًا.. وهي بتملأ كل مكان في الكون حرفيًا..
مثلًا، الشمس نفسها بتكون جسيمات النيوترينو بقدر لا يمكن استيعابه.. وبسبب كون الجسيمات دي متعادلة الشحنة، وشديدة الصغر، ف هي مبتتأثرش بقوى الطبيعة أو قوى الفيزياء الأربعة تقريبًا.. مبتتأثرش بالقوة الكهرومغناطيسية بسبب تعادل شحنتها، ولا بقوة التفاعل النووي القوي أو التفاعل النووي الضعيف، ولا حتى بالجاذبية بسبب إن الجاذبية مالهاش تأثير أصلًا على المستوى الذري..
يعني الخلاصة إنها جسيمات رايقة وفي حالها مبتتأثرش بأي قوى فيزيائية تقريبًا.. أنت وانت قاعد دلوقتي بتقرا مثلا، في أكتر من ٦٥ مليار نيوترينو بيعدوا من خلال جسمك في كل لحظة من غير ما تحس
بس في جسيمات نيوترينو تانية بقى طاقتها عالية شوية، الجسيمات دي بقى مبتقدرش تعدي من خلال كوكب الارض مثلًا.. وده بسبب إن طاقتها أكبر بمليون مرة من طاقة أي جسيمات إحنا نقدر نكونها هنا على الأرض.. ف عشان كده مبتقدرش تعدي من خلال كتلة الأرض الصلبة..
حلو لحد كده؟!.. تمام..
المهم.. جهاز أنيتا ANITA ده بقى هو عبارة عن حاجة عاملة زي الرادار كده.. بيستعملوه للكشف عن جسيمات النيوترينو عالية الطاقة High Energy Particles اللي قلنا عليها دي، في القطب الجنوبي.. هييجي حد يسألني طب ليه القطب الجنوبي ؟!.. هقولك يا صديقي ده بسبب إن القطب الجنوبي مفيهوش حضارة بشرية تقريبًا.. فبالتالي مفيش أي أجهزة أو حاجات تقدر تأثر على قدرة الجهاز على الكشف وإلتقاط الجسيمات دي.. يعني قارة أنتاركتيكا أو القارة القطبية الجنوبية دي حرفيًا عاملة زي ما تكون موجودة على كوكب تاني.. مفيهاش تلوث أو أي إشعاعات ممكن تأثر على عمل الأجهزة الحساسة دي..
طيب ايه اللي حصل بقى؟!!.. أنا برغي بقالي كتير وأنت عايز الخلاصة أنا عارف
اللي حصل يا سيدي إن طلع علماء مشروع ANITA دول، وأعلنوا إنهم قدروا يوصلوا لنيوترينو بيرجع لورا في الزمن
عشان تفهم، هشرحلك ببساطة..
اللي عمله العلماء العباقرة دول بالظبط، هو إنهم جابوا منطاد صغير، أو زي بالونة كده مليانة هوا سخن، وحطوا فيها الجهاز، وطيروه لفوق في السماء.. والسبب هو إنهم شايفين إن على الإرتفاع ده، مش هيكون في أي تأثير لأي موجات راديو أو أي نوع من الموجات يأثر على دقة نتائجهم..
طيب جميل..
بعد ما طيروا البالونة وجواها الجهاز، إبتدوا يكتشفوا جسيمات نيوترينو عالية الطاقة عادي جاية من الفضاء.. لحد كده مفيش مشكلة.. عشان معروف ان جسيمات النيوترينو عالية الطاقة دي (بيسموها تاو نيوتريتو Tau Neutrino بسبب كبر حجمها وطاقتها عن الجسيمات الأخرى) هتبقى جاية من الفضاء من كل مكان.. ومش هتتفاعل مع أي حاجة بسبب تعادل شحنتها زي ما قلنا.. بس الجسم الصلب Solid Matter بتاع كوكبنا هو الحاجة الوحيدة اللي هتقدر توقفها بسبب طاقتها وحجمها الكبير دول زي ما قلنا..
يعني الطبيعي إنهم يكتشفوا جسيمات تاو نيوترينو Tau Neutrinos دي جاية من (فوق Up).. يعني جاية من الفضاء نفسه.. ده طبيعي جدًا وهو المتوقع..
لكن اللي مش طبيعي بقى إنهم إكتشفوا جسيمات تاو نيوترينو جاية من الأرض نفسها !!!!
زي ما اتفقنا، جسيمات تاو نيوترينو مش هتقدر تعبر من الأرض أصلًا.. لإن الأرض بتمتصها تمامًا لداخلها.. فبالتالي كون إنك ترصد تاو نيوترينو راجع من الأرض للفضاء، ده معناه معجزة.. كإنك بالظبط شفت واحد ميت بيصحى تاني
طب إزاي؟!..
العلماء دول قعدوا يعيدوا ويزيدوا في التجربة، يمكن تكون غلطة في النتايج.. ودي حاحة ممكن تحصل مرة كل مليار مرة مثلًا.. يعني مستحيلة.. بس هما قعدوا يجربوا بردو، ولقطوا نفس الجسيمات دي أكتر من مرة.. في الواقع لقطوها عدد كبير جدًا من المرات، بينفي تمامًا إنها ممكن تكون غلطة أو خلل في الجهاز!!
طب ده معناه إيه؟!!
بعد استبعاد كل المستحيلات، والبحث عن الحقيقة الأكثر غرابة والأكثر أناقة زي ما قال سير أرثر كونان دويل على لسان شيرلوك هولمز زمان، فإن التفسير الوحيد اللي لقوه يقدر يفسر الظاهرة دي، هو إن الجسيمات دي في الواقع بتمشي عكس الزمن نفسه!!
يعني هي مش خبطت في الأرض وردت تاني عشان ده مستحيل بل هي في الواقع بترجع في الزمن من الأرض للفضاء..
يعني جسيمات النيوترينو الغريبة دي في الواقع جاية من مكان خارج الكون بتاعنا نفسه!!! جاية من كون تاني الزمن فيه بيمشي بالعكس.. بدل ما هو بيمشي لقدام، لأ هو بيمشي لورا..
كون تاني، فيه كل قوانين الطبيعة والفيزياء بتشتغل بالعكس.. يعني مثلًا الجاذبية فيه بتزقك لبعيد عن الأجرام السماوية الكبيرة، مش بتشدك ليها..
مثلًا، الجسيمات والكواكب والنجوم، وحتى الكائنات الحية باعتبار إن فيه كائنات حية يعني، بتصغر مش بتكبر
أنت فاهم معنى اللي بقوله أو متخيله؟!!
وده مش مجرد كلام.. لأ في الواقع العلماء دول نشروا نتيجة أبحاثهم اللي قالبة الدنيا في المجتمع العلمي العالمي حاليًا، بقيادة العالم بيتر جورهام Peter Gorham، عالم الفيزياء التطبيقية في جامعة هاواي، وقائد مشروع أنيتا بالكامل ANITA..
هما أصلًا اكتشفوا الموضوع بالصدفة من كتر ما هما كانوا مش متخيلينه.. كذا مرة الجهاز يلقط حاجة وهما نفضولها اعتبارها مجرد ضوضاء استاتيكية.. لحد ما قرروا يدوروا، ولقوا النتيجة دي، من دراسة لضوضاء التقطها الجهاز من أربع سنين فاتوا، سنة 2016 !!
وحاولوا إنهم يلاقولها تفسير، ويقولوا انه ممكن النيوترينو ده مثلا يكون اتحول لنوع تاني من الجسيمات مثلا من خلال أي تفاعل من أي نوع، خلاه يقدر يعبر من كتلة الأرض، وبعدين يرجع لكونه نيوترينو تاني، بس بعد كده أكدوا خطأ الإفتراض ده لإنه مستحيل يحصل إلا مرة من وسط كل مليار مليار مرة.. وحتى لو حصل، مش هيتكرر بالكثرة دي
طب ده معناه ايه؟!
معناه إن إفتراض نظرية الإنفجار الكبير Big Bang Theory اللي كان بيقول إن مع بداية تكون الكون بتاعنا، إتكون معاه كون تاني معكوس تمامًا، بيحتل نفس المساحة المادية بتاعت الكون بتاعنا إحنا، لكن مبنقدرش نشوفه عشان هو كون معكوس، طلع صح!!
وده بردو معناه إن إفتراضات العالم العظيم وأحد مكتشفي فيزياء وميكانيكا الكم Quantum Mechanics، إروين شرودنجر Erwin Schrodinger، لما كان بيتكلم سنة ١٩٥٢ عن الأكوان المتوازية في افتراضات ميكانيكا الكم، وقال إننا عايشين في كون متعدد Multiverse يحوي ملايين الأكوان المتوازية المختلفة عنا في الخصائص والقوانين الفيزيائية نفسها، واللي بعدها هو نفسه قال عليها إنها فرضية (مجنونة Lunatic)، ومحدش كان لاقي عليها أي دليل فعلي؛ طلعت بجد مش جنون..
إحنا اكتشفنا جسيمات جاية من بره الكون بتاعنا، وبتسافر في الزمن لورا!!
جاية من كون معكوس تمامًا، وكل حاجة فيه بالنسبالنا معكوسة زي المراية بالظبط.. بل والأدهى إن لو فيه مخلوقات عايشة فيه، هيبقوا شايفيننا إحنا اللي معكوسين
طبعًا مش محتاج أقولك إن الإكتشاف ده حاليًا قالب الدنيا في المجتمع العلمي بره، والناس بيحاولوا يأكدوه تاني بما لا يدع مجال للشك، عشان لما يتأكدوا منه تاني ويسجلوه في كتب الفيزياء، هيتغير مفهومنا بالكامل عن العالم والكون، وقوانين الفيزياء اللي احنا نعرفها كلها حرفيًا..
وهنتأكد إننا عايشين في كون حرفيًا أغرب من الخيال نفسه
كل ده بيحصل بره، وإحنا قاعدين بنتفرج على مسلسلات رمضان.. هسيب ليك أنت الحكم
بقلم الكاتب: محمود علام
مصادر ممكن تفهموا منها أكثر:
