خلينا متفقين ان السينما هي أول منصة لعرض الفيديو أو الصورة المتحركة
عشان كده هي مصدر القواعد اللي بنمشي عليها سواء انت فيديوجرافر أو سينماتوجرافر
عشان كده هنتكلم في السلسلة دي عن الـ Visual Storytelling وهيكون المرجع بتاعنا السينما
ولكن كل حاجة بنقولها تقدر تطبقها في تصوير الفيديو واحيانا الفوتوغرافية كمان
هنتكلم انهاردة زي ما واضح في عنوان التدوينة عن حجم اللقطات والكادرات…
اكتر حجم لقطة شائع في كل الأفلام هو extreme wide/long shot
وهو افضل حجم تبدأ بيه المشاهد والفيلم نفسه كلقطة افتتاحية له
لانها بتهيئ للمشاهد اللي هيشوفه من مكان والوان
والاستايل اللي الفيلم هيمشي عليه ووقت المشهد ليل ولا نهار وحجم الأشخاص بالنسبة للمكان اللي هما فيه
وعادة بيتبعها Master Shot
بردوا بتستخدم لتوضيح مكان المشهد والوقت وبتوضح الأشخاص الموجودين في المشهد ده وعلاقتهم ببعض
والـ Wide/Long Shot
بتكون مفيدة بردوا في توضيح المكان والوقت وحجم الأشخاص وعلاقتهم بالبيئة المحيطة وعادة بتستخدم لنقل مشاعر الشخص اللي في الكادر زي العزلة والوحدة والتوهة والحيرة
ثم الـ Full-Body Shot
من اسمها هي اللقطة اللي بتظهر البطل في الكادر بشكل كامل from head to toe وبتستخدم لما البطل يعمل أداء ويحكي قصة مش بس بوشه إنما بجسمه كله
الـ Medium-Full Shot او Cowboy
حجم اللقطة وبتسمى Cowboy لان ظهرت أهميتها في افلام الغرب الامريكي Western Films واللي كان الأبطال فيها بيحصل بينهم معركة
بيقفوا ادام بعض والاسرع فيهم في سحب المسدس هو اللي بيضرب التاني بالنار وينتصر
فكان حجم اللقطة ده مهم جدا لإظهار المسدس اللي بيكون متعلق في حزام الابطال فهي كمان بتساعد في إظهار قوة أحد الأشخاص وسيطرته وثقته
الـ Medium Shot
من اكثر اللقطات الشائع استخدامها لانها وسطية مش درامية زي الـ Closeups واللي هنتكلم عنها لسه ولا عزلة زي الـ Wide وبتكون مفيدة جدا في توضيح رد فعل البطل على فعل خارجي مع إظهار الفعل ده
الـ Medium-Closeup shot
بتقلل الارتباك والملهيات وبتحط بطل المشهد في إطار يساعدك تركز معاه ومع تعابيره وردود أفعاله وتتنقل لك مشاعره مع ظهور اجزاء من البيئة المحيطة بيه
الـ close-up shot
وهنا بيكون بطل المشهد هو بطل الكادر بتملى المشهد بوشه عشان تخليه هو المسيطر على المشهد وبيكون لها تأثير درامي كبير على المشاهد لانها بتنقل تعابير البطل بدقة خصوصا لما بيكون فيه توتر في أجواء المشهد
الـ choker shot
نفس فوايد وتأثير واستخدامات الـ close-ups ولكن الكادر بيكون اضيق شوية تقريبا من اول الجبهة لغاية تحت الفم
واخيرا الـ extreme close-up shot
طبعا ليها بردوا تأثير درامي كبير جدا وحماسي واحيانا التوتر او الغموض على المشاهد بتكون تركيز على أجزاء من العنصر زي الفم او الاذن
ولكن غالبا والاقوى فيهم بيكون تركيز على العين وهي الاقوى لانها زي ما بيقال العيون هي نوافذ الروح
قلنا في الكومنتات انت بتفضل أي حجم لقطة من اللي قولناهم وايه اللي بتستخدمه اكتر؟…
