لو أنت لسه متعرفش!
تعالى أحكيلك على إشاعة مرعبة بدأت ألاحظها بتنتشر على السوشيال ميديا مؤخرًا.. وقبل أي حاجة خليني أقولك إن البوست ده غير اعتيادي، ومش مبني على حقائق لا تقبل الشك كعادة المقالات اللي بقدمها، بل هو فيه شك كتير وخيالات وتوقعات وشطحات ممكن متناسبش كل الناس.. ف تقدر تعتبره دعوة للتفكير والنقاش مش أكتر.. تمام؟!
كوباية الشاي الحلوة ف إيدك، ومعاها عود النعناع، وبص يا عم 
مبدئيًا كده، لو حد قرأ روايتي (الجيل الثالث) اللي صدرت في معرض الكُتب اللي فات، هيعرف انها كانت بتتكلم عن عالِم في المستقبل إسمه إدوارد تاسك، إبتكر جنس جديد من الكائنات الحية إسمه (الجيل الثالث أو G.E.N.III) باستعمال أبحاث فيزيائية على ميكانيكا الكم أدت لإبتكاره تكنولوجيا تخليق صناعي جديدة إسمها (خلية الرب God Cell).. وإن الجنس الحي ده تم استعباده بعد كده من البشر باعتبارهم الآلهة اللي صنعتهم، لحد ما الجيل الثالث ثاروا عليهم وحصلت حرب أهلية وعالمية ضخمة ما بين البشر والجيل الثالث دمرت المجتمع العالمي بأكمله، إنتهت بكارثة كونية قضت على الحضارة على الكوكب كله..
أيه الكارثة؟! 
الكارثة دي يا سيدي كانت عبارة عن اكتشاف كوكب عاشر موجود في المجموعة الشمسية وحجمه أكبر من الأرض ب 10 مرات.. الكوكب ده ظهر فجأة من مداره الطويل اللي بيستغرق 20 ألف سنة عشان يتم دورة واحدة حوالين الشمس، وبدأ يقرب من كوكب الأرض ويبقى مرصود بالمراصد الفلكية اللي عندنا، وبسبب اقتراب مجال جاذبيته الضخم ده لحدود حرجة من الأرض، أدى لاختلال في توازن الطبيعة الأرضية، بدأ بزلازل وبراكين هائلة، وانتهى بنيازك لا حصر لها، وطوفان عظيم دمر صور وأشكال الحياة المعروفة على الكوكب بأكمله، تمهيدًا لحدث أعظم هيحصل بعدها، هيخلي التاريخ اللي احنا نعرفه كله يبدأ من أول وجديد وتتعكس فيه الأدوار ما بين الآلهة والمخلوقات، ويتعمله Restart بشكل غريب ومخيف محدش كان يتصوره..
مش هتكلم أكتر من كده عشان محرقش حبكة الرواية بالكامل للي لسه مقرأهاش وناوي يطالعها..
المهم.. كل ده جميل والمفروض إنه كان خيال من المؤلف (اللي هو أنا).. وهو كان بالمناسبة مبني على أساطير الحضارة السومرية اللي هي حضارة العراق القديمة، اللي كانت بتقول إن في جنس إسمه الأنوناكي جايين من كوكب عاشر في المجموعة الشمسية إسمه (نيبيرو Nibiru)، وإن الكائنات دي هي اللي (صنعت) البشر كعبيد ليهم عشان يساعدوهم في التنقيب عن المعادن النفيسة في باطن الأرض، وبعدين مشيوا من كوكبنا بسبب كارثة زي اللي فاتت كده..
كل دي طبعًا المفروض إنها مجرد أساطير حضارية.. ده غير إن موضوع الكوكب العاشر ده عليه اختلافات كتير.. يعني مثلًا في أدلة فعلًا لقاها العلماء مايكل براون Michael Brown وكونستانتين باتيجين Constantine Batygin في سنة 2015 بتأيد وجوده فعلًا
وبتقول -بشكل فرضي بحت- إننا لسه مرصدناهوش عشان مداره بعيد جدًا عننا، بمسافة أكتر من 400 وحدة فلكية!!
عشان تفهم المسافة، يكفي إني أقولك إن الكوكب القزم بلوتو يبعد عننا مسافة 40 وحدة فلكية بس!!
والموضوع ده في ناس مسلمين موحدين ومؤمنين بالله، واخدينه بشكل حقيقي، وبيقولوا إن الكوكب العاشر أو نيبيرو ده هو (النجم الطارق) أو (النجم ذو الذيل) المذكور في القرآن، وإنه حقيقي فعلًا وهيظهر قريب في السماء ويقترب مننا.. وإن ظهوره وتأثيره على طبيعة كوكبنا هيقترن بعلامات الساعة ويوم القيامة وشروق الشمس من مغربها..
لحد هنا الموضوع مجرد خيال.. هو مرعب آه، بس يظل مجرد إدعاء شاطح شوية من ناس خيالها واسع.. مش أكتر من أسطورة مسلية يعني..
بس المصيبة بقى إن في ناس بتقول إن اللي حصل في #الجيل_الثالث ده هيحصل بجد في الفترة اللي جاية وإنه مش مجرد خيال!!! والدليل أيه؟!.. الزلازل اللي عمالة تضرب أماكن مختلفة ومتفرقة في الأرض بكثرة غير معتادة.. آخرها سلسلة زلازل عنيفة في المحيط الهادي جنب سواحل نيوزيلاندا بقالها أسبوع تقريبًا، ولسه إمبارح شدتها زادت لدرجة إن حصل زلزالين ورا بعض بقوة 7.1 على مقياس ريختر، وبعدها زلزال عملاق في المحيط رج الدولة كلها، بقوة خزعبلية تعتبر من أقوى الزلازل المعروفة، وصلت شدته لـ 8.1 على مقياس ريختر!!
والزلازل دي تسببت في إن الدولة عملت إخلاء كامل للناس اللي كانت على السواحل كلها، وشغلوا إنذار موجات التسونامي اللي ضربت فعلا الشط بعدها، بس مسببتش خساير كتير حسب كلامهم.. بس لسه الزلازل لحد دلوقتي مستمرة..
طب الكلام ده حقيقي ولا لأ؟!.. الله أعلم.. بس هو مع تتبعي لبعض الأخبار اللي بترصد موضوع الزلازل ده، لاحظت إنه كتير فعلًا الفترة اللي فاتت بشكل مش طبيعي لدرجة إن في أكتر من 379 هزة أرضية بقوى مختلفة ضربت بقاع متفرقة من الكوكب يوم الخميس فقط!!
ممكن تشوف اللينك ده لو حابب تشوف بنفسك كمية الزلازل اللي حصلت في نيوزيلاندا.. علمًا بإن عددهم أكتر من 68 لحد دلوقتي!!.. وإن الطاقة التدميرية اللي خارجة منهم توازي حوالي 43 قنبلة ذرية!!
ده اللينك أهو:
وده لينك تاني مفصل أكتر من موقع حكومي نيوزيلندي:
وده غير الزلازل اللي في أماكن تانية كتير من العالم وبردو زايدة بشكل ملحوظ.. ممكن تشوف بنفسك على جوجل إحصائياتها..
طب ده معناه أيه؟!
حسب كلام الناس اللي بيروجوا لنظرية كوكب نيبيرو اللي بيقترب ده، ف هما بيقولوا إنه حاليًا مختفي وراء المشترى، وإنه هيصبح ملحوظ في خلال الفترة اللي جاية، واللي ممكن توصل لسنين.. وإن اللي إحنا بنشوفه من زلازل وكوارث طبيعية ده بيحصل من تأثيرات الكوكب ده.. ورابطين الموضوع بزلازل نيوزيلندا بشكل غريب.. وكمان في بعض منهم بيشطحوا أكتر وبيدخلوا الموضوع في نظرية مؤامرة ضخمة، بتقول إن أصحاب القرار ومؤسسات الفلك والفضاء عارفين إن الكوكب ده موجود وبيقرب، ومخبيين عشان ميحصلش ذعر عالمي.. وده بالمناسبة بردو حصل بالنص في رواية #الجيل_الثالث!!
طيب هو في أيه؟!.. هل الموضوع حقيقي؟! 
الحقيقة أنا معرفش ومقدرش أجزم، لإن في علماء فلك كبار وليهم إسمهم في ناسا بيقولوا إن الكوكب ده موجود وهنكتشفه قريب.. بس كونه بقى له علاقة بموضوع نيبيرو والنجم الطارق ده، دي حاجة في علم الغيب واحتمال ضعيف جدًا..
الموضوع بقالي يومين بسمع عنه بشكل متكرر ومريب ومش عارف ليه هو منتشر أوي كده.. بس أنا هقولك حاجة واحدة ممكن تطمنك شوية.. الحاجة دي هي إن مستحيل أي حد مننا إحنا البشر الضعفاء يعرف الغيب ويبقى عنده علم مسبق إن يوم القيامة جاي.. وده بكلام ربنا مش كلامي.. دي حاجة معروفة لأي شخص حتى لو مش متدين.. عشان المفروض إن القيامة بتحصل لما الناس بتغفل عنها، وكمان بتحصل فجأة من غير ما حد يبقى متوقعها خالص.. ف صعب شوية تكون في ناس عندها علم مسبق بحدث عظيم زي ده.. وده اللي بيخليني أقول إن الموضوع في الواقع فيك زي معظم نظريات المؤامرة الشاطحة اللي بدأت تظهر السنتين اللي فاتوا..
بس كده.. أنا عرضتلك الحقايق اللي أعرفها كلها، وكلمتك عن الإشاعة الغريبة اللي عمال بسمعها دي واللي أنا مؤمن إنها مجرد نظرية مؤامرة مالهاش أساس من الصحة، زيها زي الباقيين.. ف أنت رأيك أيه؟!.. شايف الموضوع في مسحة ولو بسيطة من الحقيقة، ولا مجرد نظرية مؤامرة شاطحة شوية من ناس خيالها واسع؟!
هستنى رأيك في الكومنتات تحت.. ولو الموضوع سحلك تفكير وحابب تتناقش فيه مع ناس أكتر، يا ريت تدعم المقال بالشير عشان ينتشر لناس أكتر، والمنشن لصحابك وحبايبك يسيبولي رأيهم تحت في الكومنتات جنبك 
بقلم : محمود علام
ودي شوية المصادر اللي بتتكلم عن الزلازل
