النهارده، ولأول مرة في التاريخ العربي كله منذ بداية تعريف كلمة (عرب)، نقدر نقول بثقة إن العرب قادرين على منافسة الشعوب الغربية والأوروبية في مجال استكشاف الفضاء.. عشان النهارده بردو، الإمارات بتعلن رسميًا إن العرب لأول مرة وصلوا لأبعد مكان في الكون قدر أي عربي يوصله في تاريخنا كله..
طب أيه الموضوع ده؟!.. تعالى أحكيلك يا عم، ومتنساش كوباية الشاي والنعناع الحلوة ف إيدك ❤☕
بص يا سيدي.. الموضوع بدأ لما دولة الإمارات العربية المتحدة الشقيقة بدأت من فترة في تطوير وإعداد برنامج شامل لاستكشاف الفضاء، والإنضمام لركب الدول العلمية الكبرى المتطورة تكنولوجيًا.. وبرغم إنهم طلعوا قبل كده قمرين صناعيين في سنة 2009 وبعدها 2013، بس القمرين دول كانوا بإشتراك دولة كوريا الجنوبية في التصميم والتنفيذ..
بس دي مجرد كانت البداية..
جت سنة 2014، وقرر الشيخ محمد بن راشد آل مكتوم، حاكم دبي، إنه يأسس مركز الفضاء الإماراتي، وأول وكالة فضاء في تاريخ الدولة.. المركز أو الوكالة دي كان إسمها (مركز محمد بن راشد للفضاء Mohammed Bin Rashid Space Center).. واللي تم اختصارها بعد كده للإسم المعروف عالميًا لوكالة الفضاء الإماراتية، اللي هو MBRSC..
وبعد ما أسسوا وكالة الفضاء، بدأو علطول يحطوا لنفسهم أهداف طموحة.. منها مثلًا إن الإمارات تأسس أول مستعمرة إماراتية وعربية بالكامل فوق سطح كوكب المريخ، بحلول سنة 2117.. وطبعًا التاريخ كان بعيد، عشان كده محدش ركز كتير معاهم..
بس المجتمع العلمي الإماراتي مفضلش واقف ف مكانه.. لأ خالص.. دول قرروا إنهم يبدأوا واحدة من أكبر المهمات في تاريخ استكشاف الفضاء، وأكثرها طموحًا.. مهمة في الطبيعي كان المفروض إنها تاخد ما بين 10 لحد 12 سنة على الأقل عشان تتخطط وتتنفذ.. بس هما قدروا يعملوها ف 6 سنين بس!!.. ودي حاجة مذهلة..
طب أيه المهمة دي يا عم علام؟!
المهمة دي يا سيدي هي إنهم يصمموا مركبة فضاء متطورة، أو مسبار Probe زي ما بيسموها، ويطلقوها لمدار كوكب المريخ، عشان تبدأ دراسة شاملة لأول مرة للمناخ الكوكبي الكامل بتاع كوكب المريخ، وتصور خريطة كاملة لمعالم الكوكب كله، زي الخريطة اللي عندنا هنا لكوكب الأرض.. ومن خلال الدراسة دي، يقدروا يعرفوا أيه اللي وصل كوكب المريخ لإنه يبقى الصحراء الميتة اللي بنشوفها حاليًا، برغم إنه زمان كان فيه بحار ومحيطات وأنهار زي كوكب الأرض كده 😃
طبعًا المهمة كانت طموحة، بس هما مضيعوش وقت.. وهوووب.. علطول بدأوا تصميم المسبار بمجهود أكتر من 200 مهندس ومهندسة إماراتيين، ومشترك معاهم عقول علمية من جامعات أمريكية كبرى، زي جامعة كولورادو بولدر Colorado Boulder اللي شاركت معاهم بفريق علمي من مختبر الفيزياء الجوية والفضائية Atmospheric and Space Physics بتاعهم، وكمان شارك في المهمة فريق من (برنامج استكشاف وتحليل المريخ Mars Exploration Program Analysis Group).. أو اللي بيسموه اختصارًا MEPAG..
وبدأوا فعلًا الشغل على المسبار، وصرفوا عليه ببذخ، أكتر من 200 مليون دولار.. لحد ما بدأ ياخد شكله اللي هتشوفه تحت في الصور 👇 وبعدها تم تزويده بمعدات و وسائل تكنولوجية شديدة التطور مصممة مخصوص لإستكشاف الخصائص الفيزيائية والجوية للكوكب..
وحتى في خلال الفترة اللي كانوا بيخططوا فيها للمهمة ويبنوا فيها المسبار مكانوش ساكتين.. لأ دول حققوا رقم قياسي جديد، وهو إنهم بردو لأول مرة ف تاريخ العرب طلعوا رائد فضاء عربي لمحطة الفضاء الدولية أو ال ISS.. الرائد الإماراتي ده كان إسمه هزاع المنصوري، اللي وصل لمحطة الفضاء الدولية يوم 25 سبتمبر سنة 2019، على متن المكوك الروسي (Soyuz M-15).. وفضل قاعد على المحطة بيعمل أبحاث فيزيائية لمدة 8 أيام، وبعدها رجع الأرض مرة تانية يوم 3 أكتوبر 2019، على متن المكوك الروسي بردو (Soyuz M-12) 😃
وده لينك أهو لو عايز تقرا عن هزاع ومهمة إرسالة لمحطة الفضاء الدولية، من وكالة CNN:
يعني الناس دي داخلة مجال الفضاء ومش بتهزر.. وحاطين فعلًا ف دماغهم هدف عايزين يحققوه.. والهدف ده بدأ فعلًا ياخد شكل حقيقي مع أول إطلاق لمهمة فضائية عربية للسفر بين الكواكب Interplanetary Travel في التاريخ.. يوم 20 يوليو سنة 2020.. واتسمت المهمة بإسم مُلهِم ويخلي قلب كل عربي يتملي بالفرحة والعزيمة..
الإسم ده كان (مسبار: الأمل Hope Probe) ❤
وطبعًا مش عايز أقولك إن يوم إطلاق المسبار ده أساسًا من محطة (تانيجاشيما Tanegashima) الفضائية اليابانية، كان في مهمات أسطورية تانية لوكالات فضاء كبرى طالعة معاها ف نفس الوقت.. المهمة الأولى كانت مهمة Perseverance rover بتاعت وكالة ناسا الأمريكية، اللي هتطلع العربية الآلية الجديدة اللي بيتم التحكم فيها عن بعد، وتنزلها على سطح المريخ.. والمهمة التانية كانت Tianwen-1 الصينية اللي مطلعة بردو مسبار هيدرس حاجات معينة في الكوكب، وبعدين يهبط على السطح..
ولو هتسألني سبب انهم كلهم طالعين مع بعض، هقولك إن ببساطة عشان كل فترة حوالي سنتين كده، كوكب المريخ مداره بيبقى موجود ف خط متوازي مع كوكب الأرض، وبيوصل لأقرب نقطة ممكنة لمدار الكوكب بتاعنا ساعتها.. ف بتكون أي رحلة محتملة بيتم تخطيطها للمريخ وقتها أسهل بكتير من أي وقت تاني، وبتستهلك وقود أقل بكتير وبالتالي تكلفة أقل، وتعقيدات أقل.. والنقطة القريبة دي كانت حاصلة ف سنة 2020..
وفعلًا تم إطلاق المسبار وقتها.. وفضل الإماراتيين كلهم حاطين إيديهم على قلبهم، ومستنيين اللحظة الحاسمة، اللي هيوصل فيها المسبار للمريخ، في شهر فبراير من 2021..
وجت اللحظة المرعبة 😃
ليه مرعبة؟!.. عشان بسبب البعد الهايل اللي وصله المسبار عن الأرض، اللي هو أكتر من 480 مليون كيلومتر، قطعهم في فترة أكبر من 204 يوم، فالوقت اللي هتاخده أي إشارة مننا هنا على الأرض عشان توصله وتتحكم فيه، هيكون في تأخير أو Delay كبير جدًا هيخلي من المستحيل التحكم فيه بشكل فوري ولايف Live كده.. ف عشان كده هما صمموا نظام يخلي المسبار يبقى مبرمج على تفعيل خطوات المهمة بتاعته بشكل آلي في حالة حدوث أي مشكلة في التواصل ما بينه وما بين وكالة الفضاء الإماراتية..
والمشاكل اللي ده كان ممكن يسببها كارثية.. قولي ليه..
أقولك أنا ليه.. عشان يا سيدي السرعة اللي وصلها المسبار في طريقه للكوكب كانت خزعبلية.. أكتر من 100 ألف كيلومتر في الساعة!!.. يعني أسرع من لمح البصر تقريبًا 😅 ف لو هو قرب من الكوكب لحد لحظة معينة، واتأخر في إنه يفرمل السرعة بتاعته دي ولو ثانية واحدة، عشان يقللها لحد معين، ف ممكن ميلحقش يفرمل، والسرعة بتاعته تخليه يخرج من المدار بتاع جاذبية المريخ، ويتم قذفه في الفضاء البعيد Deep Space خارج المجموعة الشمسية نفسها 😅
فبالتالي كان في حسابات دقيقة جدًا لازم تتعمل، ويخططلها فريق من أذكى العقول عندهم.. والحسابات دي كانت بتقول إن لازم عند لحظة معينة، يتم إرسال إشارة لاسلكلية للمسبار إنه يبدأ يشغل محركات الدفع النفاث الستة اللي عنده، ويفرمل السرعة بتاعته ف خلال مدة 27 دقيقة بالظبط، عشان يقلل السرعة بتاعه من 100 ألف كيلومتر ف الساعة، لحد سرعة 18 ألف كيلومتر في الساعة.. وهتلاقي شكل توضيحي يوريك طريقة دخول المسبار للمدارات دي في صورة توضيحية تحت في أول كومنت 👇
وطبعًا العملية دي استهلكت أكتر من نصف خزان الوقود بتاعه عشان يقدر يعملها.. وبعدها، كان في فترة حوالي 11 دقيقة فضلوا مستنيين الإشارة اللي هيبعتها المسبار توصلهم في مركز العمليات، والكل حاطط إيده على قلبه بقى، وقنوات الأخبار والسوشيال ميديا واليوتيوب مترقبين، وجو فيلم مافيا خالص يعني 😃
لحد ما أخيرًا بعد 11 دقيقة، الإشارة وصلت.. واللي كانوا مستنيين كلهم نطوا من الفرح 😃 وبمب وصواريخ وبلالين بقى وأحضان وقبلات واللي أنت نفسك فيه كله.. وبرج خليفة نور باللون الأحمر رمزًا لوصول الإمارات للمريخ أخيرًا، وهتلاقي صورته تحت 👇
فجأة، وبعد أقل من 7 سنين بس من إنشاء وكالة الفضاء الإماراتية، قدروا يحفروا أسمهم كأول دولة عربية في التاريخ توصل لكوكب المريخ، أو لأي كوكب أو جسم فضائي آخر عمومًا ❤
ومش بس كده، ده في كذا رقم قياسي كمان حققوهم أنت مش واخد بالك منهم 😃 أول حاجة مثلًا، الإمارات تعتبر تاني دولة في العالم تنجح في الوصول لمدار كوكب المريخ من محاولة واحدة فقط!!.. دي مفيش أي دولة تانية عملتها قبلها غير الهند 😃 يعني ولا أمريكا ولا روسيا ولا الصين ولا أي دولة أوروبية عملوها قبلها..
وكمان حاجة.. المبهر أكتر بقى، إن السنة اللي احنا فيها دي، اللي هي سنة 2021، هي عيد الميلاد رقم خمسين لدولة الإمارات العربية المتحدة!!.. يعني الدولة دي أتأسست سنة 1971 لأول مرة، ومكانش عندهم أي حاجة حرفيًا.. وبعد 50 سنة بس، بقوا واحدة من أكبر الدول اقتصادًا ونموًا وتطور تكنولوجي في العالم، وبقوا خامس دولة في التاريخ توصل للمريخ، بعد أمريكا وروسيا والصين والهند 😃
ودلوقتي اللي هيعمله المسبار ده هو إنه هيسبح في المدار الأولي بتاعه ده لفترة لحد ما يتم تجهيز وتشغيل المعدات بتاعته وإعدادها وضبطها للعمل، وبعدين هيبدأ في التقاط البيانات من مدار مرتفع، وهيعمل مسح شامل لتضاريس وخريطة المريخ كلها، وهيدرس الغلاف الجوي الكامل بتاعه لأول مرة في التاريخ بردو.. وبعدين هيلقط صور حقيقية بكاميرا متطورة، للكوكب من المدار العالي ده، وهتبدأ الصور دي توصلنا على الأرض هنا في شهر مايو ❤
الحقيقة عزيزي القاريء أنا مش عارف أنت حاسس بأيه وأنت بتقرأ الإنجاز ده دلوقتي، بس أنا فخور جدًا.. فخور بدولة كبيرة ورائعة ومتطورة زي الإمارات قدرت تعمل خطوة زي دي، وتحفر إسمها في التاريخ بعد 50 سنة فقط من تأسيسها، وترفع إسم العرب كلهم لفوق وتحطهم على طريق المنافسة الحقيقية في تكنولوجيا المعلومات وفيزياء الفضاء والفلك.. وده كان حلم بالنسبالي من زمن بعيد جدًا، وكنت أتمنى أشوف بلدي مصر بتاخد فيه خطوات مشرفة زي الإمارات كده، بس للأسف ليس كل ما يتمناه المرء يدركه..
وبرغم كده لسه مفقدتش الأمل إني في المستقبل أشوف مصر وحضارتها العظيمة الممتدة لأكتر من 7 آلاف سنة من التاريخ البشري، بترجع لمكانتها الطبيعية في سقف العالم والحضارة، وتاخد خطوات حقيقية زي دي.. سواء بتمويل حقيقي وضخم لوكالة فضاء مصرية كبرى تنافس الوكالات الغربية، وتنضم للإمارات.. أو كمان إنشاء مراكز أبحاث على مستويات علمية عالمية تستقطب العلماء المصريين العظماء اللي قالبين المجتمع العلمي في العالم كله.
العلماء والباحثين المصريين مكسرين الدنيا بره، وهما يعتبروا من أكبر الشعوب العربية إثراءً للمجتمع العلمي للكوكب.. وكل اللي ناقصهم بس هو شوية اهتمام من بلدهم، وتمويل حقيقي لمشاريعهم، زي التمويل اللي بيحط لمشاريع تانية بدون ذكر أسماء.. وأنا متأكد إن لو ده حصل، فهو في مقدوره نقل الدولة المصرية والشعب المصري نقلة حضارية محدش فينا كان عمره يحلم بيها، تبهر العالم كله..
هل ده هيحصل ف يوم؟!
الله أعلم.. بس من حق كل إنسان يحلم إنه يشوف بلده أحسن بلد في الدنيا، ويفتخر بيها زي ما الإماراتيين دلوقتي فخورين ببلدهم.. وهو ده حلمي اللي هستنى إنه ف يوم بإذن الله يتحقق ❤
ألف مبروك لدولة الإمارات العربية المتحدة على الحدث التاريخي ده ❤💪
شوف الصور اللي مع البوست وافتخر بعروبتك وبالإنجاز العلمي والتكنولوجي العظيم اللي عمله إخواتك الإماراتيين وباركلهم 👇❤ وهتلاقي صور من احتفالات الحكام الإماراتيين و وكالة الفضاء بوصول العرب للمريخ وهاشتاج #العرب_إلى_المريخ #ArabsToMars على تويتر في الكومنتات 👇
ولو المقال عجبك، متنساش تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في الكومنتات 👇
الشير بيعبر عن دعمك، وكمان بيساعد في نشر المجهود الكبير اللي ببذله في كتابة المقالات دي، وبيوصله لناس أكتر، ف متبخلش به لو شايف الجهد يستحق
بقلم الكاتب: محمود علام
و زي ما اتعودنا دي المصادر للي حابب يقراء في الموضوع اكثر
