تيجي أحكيلك حاجة مبهرة تدفيك ف البرد اللي إحنا فيه ده؟! 😀
شايف الصور اللي قدامك دي؟! 👇
ده هيبقى شكل أول طيارة يتم تجريبها وتشغيلها على سطح كوكب آخر، منذ بداية تاريخ الجنس البشري كله 😀
سيبني أحكيلك الموضوع برواقة، وقوم إعملنا كوبايتين شاي بنعناع حلوين ❤☕
بص يا عم.. اللي أنت شايفه في الصور ده هيبقى شكل أول مركبة طائرة أو هليوكوبتر هتطير على سطح كوكب آخر في التاريخ.. إسمها هيبقى (مروحية: البراعة) أو (Ingenuity Helicopter).. ودي تم تصميمها مخصوص من قبل مهندسين الطيران والإيرودايناميكس Aerodynamics بتوع وكالة الفضاء الأمريكية (ناسا NASA)..
طب أيه الهليوكوبتر دي بالظبط، وليه هي عظيمة؟!
الهليوكوبتر دي يا عم بدأ تصميمها ف مختبرات ناسا، كمجرد فكرة..
تجربة طموحة شوية كان نفسهم يعملوها، ويشوفوا أيه اللي هينتج منها.. عشان لو نجحت، هتبقى إنجاز شبيه بإنجاز الأخوين رايت Wright Brothers اللي صمموا أول طيارة تجريبية في التاريخ، وفي يوم 17 ديسمبر سنة 1903، أثبتوا لأول مرة حاجة كان البشر قبلها فاكرينها مستحيلة تمامًا..
إن الإنسان ممكن يطير ف السماء!!
ومع نجاح تجربة الأخوين رايت، وإنتشار ابتكار طيارة الركاب لأول مرة، اتفتحت قدام الجنس البشري احتمالات لا نهائية، كانت السبب في انتقالنا للعصر الحديث..
احتمالات خلت العالم كله أصغر بما لا يقاس.. بدل ما كنا بناخد أسابيع وشهور عشان نسافر بالسفن أو الخيول والقطارات من دولة لدولة، الموضوع أصبح ممكن في خلال ساعات قصيرة، من خلال الطيران 😀
وبعدها ب 118 سنة، جه علماء وكالة ناسا للفضاء، وقرروا إنهم يكتبوا التاريخ من جديد..
بس المرة دي بإنهم يطيروا أول طيارة بشرية الصنع، على أرض وجاذبية ومناخ كوكب تاني مختلف عن الأرض..
كوكب المريخ ❤
طبعًا هتسألني هو أيه المبهر والصعب في الموضوع يعني؟!..
ماهي طيارة عادي ممكن تطير ف أي حتة.. وساعتها هقولك لأ إستناني يا معلم كده.. هشرحلك..
أول حاجة يا صاحبي، الغلاف الجوي بتاع المريخ خفيف جدًا جدًا لدرجة أنت متقدرش تتخيلها..
لو حطيناها بالأرقام، هقولك إن كثافة الجو في المريخ أقل من 1% من الغلاف الجوي اللي إحنا عايشين عليه هنا في الأرض!!..
يعني الجو بتاعنا على الأرض اللي احنا متعودين عليه، أتقل بحوالي 99% من الجو الموجود على المريخ!!
وده معناه إن عشان نصمم مركبة تقدر تطير في الجو ده، ف لازم وزنها يبقى خفيف جدًا لدرجة ينفع تخليها تقدر تطير في الجو ده..
لإنه أصلًا يعتبر مفيش جو.. يعني مفيش هواء.. يعني المركبة هتبقى طايرة ف شبه فراغ.. ف هتطير إزاي ف وسط زي ده؟!..
أي هليوكوبتر المفروض إنها بتشتغل من خلال إن المراوح بتاعتها بتزق الهواء لتحت، وترفعها لفوق.. بس هترفعها إزاي لو مفيش هواء أصلًا؟! 😀
ومش بس كده.. ده المريخ كمان الحرارة فيه قاتلة، والظروف عليه قاسية لدرجة ميتحملهاش أي حد.. وحتى المواد المعدنية ممكن يحصلها مشاكل فيها..
يعني خليني أقولك إن حرارة الكوكب بتوصل لحوالي 90 درجة تحت الصفر بالليل!!
تخيل أنت الجو، وأنت قاعد متغطي بخمس بطانيات دلوقتي، في حرارة 13 درجة 😅
ده غير كمان بعد كوكب المريخ الخزعبلي عن الأرض، اللي هيخلي التحكم الفوري عن بعد في الطيارة شبه مستحيل، بسبب إن الإشارات اللي هتخرج من هنا على الأرض عشان توصلها هتاخد وقت طويل جدًا عشان توصل للطيارة..
وممكن في الوقت ده الطيارة تخبط ف أي حاجة وتتدمر!!
ف تفتكر بقى الناس العباقرة دول قدروا يتغلبوا على الظروف دي إزاي؟!
أنا أقولك.. أولًا، هما صمموا الهليكوبتر الصغيرة جدًا دي، من مواد خفيفة جدًا، بحيث إن الهليوكوبتر كلها يكون وزنها أقل من 1.8 كيلو..
يعني قد كيس البرتقال اللي بتشتريه من الفكهاني وأنت طالع 😅
كمان صمموا الشفرات أو المروحة بتاعت الهليوكوبتر بحيث إن طولها يوصل لحوالي 1.2 متر، عشان تستغل أكبر قدر ممكن من الهواء..
وكمان زودوها بموتور صغير جدًا ومتطور، بيخليها المروحة دي سريعة جدًا.. بتلف أكتر من 2400 ف الدقيقة.. يعني أسرع من أي هليوكوبتر موجودة عندنا هنا على الأرض بخمس مرات تقريبًا!! وده عشان يزيدوا كفاءة المحرك ويخلوها تقدر ترتفع من على سطح الكوكب مسافة 5 متر تقريبًا..
كمان زودوها ب 6 بطاريات من أيونات الليثيوم(Lithium-ion)، بيتم شحنها بتكنولوجيا متطورة ومتقدمة جدًا، بتعمل بالطاقة الشمسية..
بحيث إنها تقدر تشحنها بالكامل في فترة قصيرة جدًا.. دقايق بالكتير..
ده غير إنهم صمموا نظام طيران بيشتغل بالذكاء الإصطناعي الأوتوماتيكي، عشان إحنا مش هنقدر نتحكم فيها من الأرض..
ف هما رسمولها خريطة وخطة طيران مسبقة، وهيخلوها هي تطير بنفسها من غير أي تحكم!! 😀
طب يا عم علام.. هي الهليوكوبتر دي رايحة المريخ إمتى، وهدفها أيه بالظبط؟!.. هما العيال بتوع ناسا دول فاضيين للدرجة دي يعني؟!
أول حاجة بالنسبة لنقطة هي هتوصل المريخ إمتى، ف هي خلاص على وشك إنها توصل للمريخ خلال الأيام اللي جاية، لأنها أصلًا طالعة كجزء من مهمةPerseverance Rover بتاعت ناسا، اللي انطلقت في شهر 7 اللي فات جنبًا إلى جنب مع مهمة المسبار الإماراتي (الأمل Hope) اللي لسه واصل المريخ الأسبوع اللي فات..
المهم.. مهمة Perseverance Rover دي هدفها كان إنها تنزل مركبة أرضية متحركة جديدة على سطح المريخ، بيتم التحكم فيها عن بعد من هنا على الأرض..
بس اللي هما عملوه، هو إنهم حطوا الهليوكوبتر Ingenuity دي ف مكلن مخصص ليها، في قاع الروفر.. وكل اللي هيحصل، هو إن لما الروفر تهبط بسلام على سطح المريخ في آخر شهر فبراير اللي إحنا فيه ده، هتقوم فاتحة الفتحة بتاعت القاع بتاعها ده، وتنزل الهليوكوبتر على الأرض، وبعدين تتحرك وتبعد من فوقها.. وساعتها هيبعتوا إشارة التشغيل للهليوكوبتر ويبدأوا التجربة..
شكل الطيارة وهي بتطير و وراها الروفر 👇
ولو التجربة دي نجحت، هتبقى علامة فارقة في التاريخ كأول مركبة طائرة من صنع بشري تقدر تطير في سماء كوكب آخر غير الأرض 😀 وهتفتح سيل من الأبحاث والتطبيقات فيما بعد، لاستكشاف المريخ والكواكب الأخرى، من خلال المركبات الطائرة، مش العربيات الصغيرة ذات الدفع الرباعي!!
لأول مرة هنقدر نشوف مشهد الأفق على المريخ، من مركبة طائرة فوق السطح، مش مجرد مركبة على الأرض!!.. هنقدر نستعملها كمان في البحث عن أي حاجة إحنا عايزينها على السطح، بشكل أكثر كفاءة من أي مركبة بتمشي على الأرض..
وكمان هنقدر نستعملها في نقل أي عينات من التربة من أي حتة إحنا عايزينها على السطح، للمركبة الأرضية أو الروفر، عشان نقدر بعد كده ناخدها للأرض ونبحث فيها عن أثار لوجود أي نوع من الحياة الميكروسكوبية أو العضوية Organic/Microscopic Life Forms 😀
اللي أنت شايفه في الصور تحت ده هو تصميمات بالجرافيك لشكل الهليوكوبتر وهي طايرة على سطح المريخ، ومعاها البرسيفيرانس روفر بتاعت ناسا 👇
أنت أيه رأيك؟!..
شايف شكل المستقبل اللي احنا عايشين فيه، والإنجازات اللي البشر بيوصلولها ف وسط حياتنا أنا وأنت؟!.. متخيل مدى التطور اللي هنوصله بعد عشر سنين بس، لما إحنا دلوقتي -كبشر- بنطير أول طيارة من صنعنا على سطح كوكب آخر؟!
تخيل أنت سنة 2030 مثلًا، البشر هيكونوا وصلوا لأيه، وبيعملوا أيه، وراكبين عربيات شكلها أيه.. إحلم معايا بس..
عشان كده قلت ودايمًا هفضل أقول زي ما بيقول أي حد متابع التطور التكنولوجي المذهل اللي بيزيد مع كل يوم ده..
ياله من وقت نكون فيه على قيد الحياة
What a time to be alive ❤
المهم.. لو المقال عجبك، متنساش تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في الكومنتات 👇
الشير بيعبر عن دعمك، وكمان بيساعد في نشر المجهود الكبير اللي ببذله في كتابة المقالات دي، وبيوصله لناس أكتر، ف متبخلش به لو شايف الجهد يستحق ❤
