تعرف إن علماء الفلك اكتشفوا كوكب هو عبارة عن جهنم حقيقية زي ما بنتخيلها ف تصوراتنا عن الحساب ويوم القيامة، والنار اللي هتبلع المُذنبين والكفار ذوي الخطايا؟!
هتسألني ليه، هقولك عشان الكوكب ده يعتبر واحد من أكتر الكواكب ذات الطبيعة المتطرفة اللي تم اكتشافها في المجرة كلها لحد دلوقتي.. تخيل كوكب المحيطات بتاعته هي عبارة عن حمم بركانية، وبيمطر صخور بدل المية!!
كوباية شايك الحلوة ف إيدك، وتعالى هحكيلك عن الموضوع المرعب ده.. ومتنساش النعناع
بص يا عم.. مبدئيًا، شايف الصور اللي قدامك دي؟
دي يا سيدي أشكال بالجرافيك متصممة للكوكب اللي بحكيلك عليه، بناءً على بيانات المراصد الفلكية اللي بتدرسه..
الكوكب اسمه K2-141b.. وهو عبارة عن جحيم حقيقي زي ما بتتخيله في أبشع كوابيسك!!.. هتسألني ازاي، هقولك إن أول حاجة؛ الكوكب بيدور حوالين نجم برتقالي قزم حجمه صغير نسبيًا، بس هو قريب جدًا منه، لدرجة انه شبه لازق فيه..
وبسبب ده، ف الجاذبية بتاعت النجم ده مأثرة على الكوكب جامد، ومخلياه يبقى محبوس ف مدار معين حوالين النجم، وحتى مش عارف يدور حوالين نفسه.. حاجة بيسموها ف علوم الفلك Gravitationally Locked In، أو مُقيد بتأثير الجاذبية.. فبالتالي نفس الوجه من الكوكب هو اللي مواجه الشمس بتاعته علطول وطول الوقت..
وبسبب ده، فدرجة الحرارة على السطح بتاعه بتوصل لحوالي أكتر من ٥٤٣٢ درجة فهرنهايت!! ودي حرارة مش بس كافية لإنها تبخرك وانت واقف.. لأ دي حرارة بتبخر الصخور نفسها!!
أيوه.. زي ما انت سمعت!! الكوكب ده الغلاف الجوي بتاعه هو عبارة عن صخور متبخرة!!.. الكوكب عليه محيطات كاملة شاسعة الحجم من الحمم البركانية.. وبسبب الحرارة الغير قابلة للاستيعاب، ف الصخور نفسها بتاعته بتتبخر، وبتكون بخار صخري ورياح عنيفة سرعتها أكبر من ١,٧٥ كيلومتر ف الثانية الواحدة!! يعني أكبر من سرعة الصوت!!
انت متخيل؟!.. متخيل إني بقولك رياح متكونة من الصخور المنصهرة المتبخرة، اللي سرعتها أكبر من سرعة الصوت؟!.. تخيل لو انت واقف قدام ريح زي دي، هيحصل فيك ايه؟!
ومش دي بس المشكلة.. ده بسبب طبيعة المناخ بتاع الكوكب، وان جزء واحد منه هو اللي مواجه للشمس بشكل دائم، ف كمان الوجه التاني من الكوكب ظروفه سيئة، ودرجة الحرارة عليه أقل من سالب ٣٢٨ درجة فهرنهايت!!
يعني كلمة متجمد هي كلمة قليلة عليه
واللي بيحصل هو إن الرياح اللي بتتكون في الجزء الحارق المواجه للشمس ده بتسافر بسرعة أكبر من الصوت نفسه ناحية الجانب المظلم.. ف لما بتوصل هناك، الصخور اللي ف الغلاف الجوي بتتجمد تاني، وبتبدأ السما تمطر صخور!!
تخيل كده انت واقف في أمان الله، وتلاقي السما بتمطر عليك.. بس بدل المية، بترشقك صخور ف كل سنتيمتر مربع ف جسمك!!
وبعدها بتبدأ المواد السامة المكونة للصخور المتبخرة دي في انها تمطر مع الصخور، وتنزل في محيط من اللافا Lava أو الحمم البركانية.. ويبتدي المحيط ده يجري مرة تانية ناحية الجانب الحارق من الكوكب، فيتبخر تاني وهكذا!!.. نفس اللي بيحصل على كوكبنا في المية، بيحصل هناك بس في الصخور والحمم البركانية!!
لو انت مش مصدق ان في كوكب ممكن يبقى عامل كده، ف خليني أقولك ان التفاصيل دي كلها منشورة في النشرة البحثية الشهرية لمجتمع الفلك الملكي Royal Astronomical Society.. وهتلاقي البحث هنا:
تخيل أنت كوكب زي ده بأوصافه دي، أيه ناقصه أكتر من كده عشان يبقى جهنم حقيقية زي ما بيتخيلها كل واحد فينا؟!
بشمسها اللي بتبقى فوق دماغك بدون ضل.. وحرها اللي ممكن يبخر جلدك نفسه من على عضمك، وبعدين يبخر عضمك نفسه وراه!!
وبردها اللي ممكن يجمد الأفكار نفسها جوه دماغك، لدرجة انك تنسى انت مين وجاي تعمل ايه هنا في قراءة المقال ده..
بس مهما كان البرد شديد أو الحرارة أشد، متخليش ده ينسيك إنك تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في الكومنتات
الكاتب : محمد علام
