لو أنت قاعد بتقلب في الفيسبوك ومش عارف أيه الأحداث المذهلة اللي بتدور حواليك في العالم، خليني أقولك إن في تسريبات طلعت من التقرير الرسمي بتاع (الأجسام الطائرة مجهولة الهوية UAPs) والتسريبات دي بتقول حاجات لو فكرت فيها هتلاقيها مرعبة للغاية!!
طب أيه اللي حصل بالضبط؟!
عايزك بقى تركز معايا، وتسيبك من أي قناعات مسبقة ممكن تبقى عندك عن لغز الأجسام الطائرة المجهولة أو الـ UFOs اللي بقاله 70 سنة قالب الدنيا نظريات مؤامرة ده، وتفتح دماغك جدًا لتقبل أفكار وحقائق جديدة، عشان اللي جاي هيصدمك فعلًا مش هزار.. وكله حقيقي تمامًا بما لا يدع مجال للشك، زي ما عودتك دايمًا..
بص يا سيدي.. من كام يوم ، حصلت تسريبات من مسئولين جوه وزارة الدفاع الأمريكية أو (البنتاجون Pentagon) نفسها، أكتر من 5 أشخاص من الناس اللي عندهم اطلاع كامل على حقائق التقرير الرسمي عن حقيقة الأطباق الطائرة اللي المفروض هيتعرض على الكونجرس يوم 25 يونيو، أكدوا في تقرير رسمي كان سبق صحفي لجريدة النيويورك تايمز New York Times بدون أي تردد إن “الحكومة الأمريكية عارفة ومتأكدة بما يلا يدع مجالًا للشك إن الظواهر الغريبة اللي بنشوفها، والأجسام الطائرة مجهولة الهوية دي هي ليست تكنولوجيا أمريكية سرية بأي حال من الأحوال، وإنها متفوقة بفارق ضخم على أي تكنولوجيا شفناها على الأرض هنا في أي وقت من التاريخ!!”
والناس دول اشترطوا عدم ذكر أسماءهم عشان هما غير مصرح ليهم بالكلام في الموضوع ده قبل ما يتم الكشف الرسمي عن التقرير يوم 25/6، وقالوا كمان حاجة مرعبة..
الحاجة دي هي إن في خلال العشرين سنة اللي فاتوا، أجهزة الإستخبارات الأمريكية شافت وقائع وأحداث ومعلومات عن الأجسام الطائرة المجهولة دي، بتطير فوق دول تانية وجيوش تانية.. وقالوا إن في احتمال إن الأجسام دي تكون عبارة عن تكنولوجيا حربية حديثة طورتها الصين أو روسيا.. وده عشان الدولتين دول أصلًا معروف عنهم من زمان إنهم بيمولوا تجارب عسكرية ضخمة جدًا ليها علاقة بتكنولوجيا السفر والطيران الأسرع من الصوت أو زي ما بيسموها (Hypersonic Technology).. بس بردو الإحتمال ده ضعيف، عشان القدرات اللي الأجسام المجهولة دي بتقدر تعملها، سواء في سرعة سفرها في الجو أو قدرتها الفائقة على المناورة اللي يبدو عليها إنها بتخالف القواعد المعروفة عن علم الفيزياء نفسها، مستحيل يكون تم التوصل لها من قوة أرضية بالسهولة دي..
ولو ده حصل فعلًا، وطلعت الأجسام المجهولة دي أصلها من الصين أو روسيا، فده هيبقى معناه إن الدولتين دول توصلوا لتكنولوجيا أقوى وأكثر تقدمًا بمراحل لا يمكن استيعابها، عن أكثر الأسلحة الأمريكية تطورًا.. حتى الأسلحة السرية اللي لم يتم الكشف عنها من قبل!
وده اللي بينفيه التقرير اللي بيقولك بردو إن في جيوش وأجهزة استخبارات عالمية تانية بتحقق في نفس الموضوع.. ومنهم أجهزة الإستخبارات الروسية والصينية، ده غير اليابان والإستخبارات الأوروبية.. يعني الظاهرة دي عالمية، ومفيش أي حد عارف يفسرها.. هي بس ارتبطت بأمريكا أكتر لإن الناس في أمريكا بيتكلموا عنها وقلقاهم جدًا باعتبارهم القوة العظمى على الكوكب، وكون إن في طرف مجهول عنده تكنولوجيا زي دي، بتتفوق بمراحل على أي شيء يحلموا به، هو خطر أمني وعسكري واستراتيجي رهيب عليهم..
خد عندك على سبيل المثال اللينك ده، هيوريك قائمة بأشهر حوداث المشاهدة للأجسام المجهولة دي في التاريخ كله، منذ ما قبل الميلاد لحد العصر الحديث، بالتواريخ والأماكن والتفاصيل كلها، وشوف حصلت في كام دولة غير أمريكا:
يا راجل ده في واحدة من المشاهدات دي متسجلة في كتب التاريخ كويس جدًا، حصلت يوم 27 أكتوبر سنة 1954، فوق إستاد وملعب أرتيميو فرانشي Stadio Artemio Franchi في مدينة فلورنسا Florence في إيطاليا!!.. واللي حصل بالضبط هو إن أثناء ما كان بيتلعب مباراة كرة قدم بين نادي فيورنتينا وبيستواز في قلب الإستاد، وقدام عيون أكتر من 10 آلاف مشاهد من الجماهير واللاعبين، جت مجموعة من الأجسام الطائرة المجهولة أو الـ UAPs دي، ووقفت للحظات فوق الإستاد بالضبط!!.. وفضلت في مكانها شوية وبعدها انطلقت تاني مبتعدة عنهم بسرعة خارقة لا تستوعب!!.. الناس وقتها وصفوا شكل الأجسام دي بإنها طويلة ورفيعة أشبه بأعقاب السجائر..
تخيل أنت المشهد بخيالك كده.. أكتر من 10 آلاف شخص مع بعض شافوها ف نفس اللحظة.. وفي إيطاليا كمان، يعني بعيد عن أمريكا خالص!!.. كل دول بيكدبوا أو بيهلوسوا؟!.. وهتلاقي الحادثة عندك أهي فوق في اللينك ومتسجلة في كتب التاريخ ☝☝ ممكن تعمل سيرش عنها على جوجل بإسم The Fiorentina Stadium Massive Sighting..
الحقيقة الموضوع مرعب جدًا، وبيطرح أسئلة كتير وافتراضات أكتر، وكلهم أسوأ من بعض.. تعالى نفكر مع بعض كده، ونحلل الإحتمالات دي ونشوف هما ليه مرعبين للدرجة دي..
● عندك الإحتمال الأول هو إن ممكن تكون المشاهدات الغريبة دي بتحصل بسبب إن أنظمة التتبع والرادار اللي في الطيارات الحربية وأنظمة الدفاع الجوي المتطورة دي، بتفشل وبتهنج بشكل مستمر ومتتابع!!.. وده ساعتها هيبقى معناه حاجة من اتنين.. يا إما أكثر أجهزة التتبع والرادار العسكرية في العالم تطورًا هي بايظة، يا إما في قوة عسكرية من نوعٍ ما قدرت توصل لتكنولوجيا إنها تهكر أنظمة التتبع دي، وتظهر عليها حاجات غير قابلة للتفسير!.. والإحتمال ده معناه إن ممكن بسبب فشل الأنظمة دي تحصل حوادث من إطلاق النار على قوات حليفة Friendly Fire، أو على منشآت تابعة لنفس الجيش مثلًا.. يعني كده أنظمة الدفاع الجوي الأمريكية معطلة ومخترقة Compromised تمامًا.. ومش بس أمريكا.. ده في العالم كله!
وطبعًا الإحتمال ده بيغفل ذكر المشاهدات اللي تمت من ناس مالهمش علاقة بالجيش.. زي الحادثة بتاعت استاد فيورنتينا دي!!
● الإحتمال الثاني والأكثر إرعابًا هو إن في قوة عسكرية عظمى هنا على كوكب الأرض قدرت إنها توصل لتكنولوجيا متطورة لدرجة إنها بيظهر عليها إنها بتخالف القوانين المعروفة لعلوم الفيزياء والميكانيكا وديناميكيات الحركة أو الـ Aerodynamics نفسها!!.. والأجسام دي إحنا مش عارفين نفرق بينها وبين الكائنات الفضائية!!.. بس لو ده حقيقي، يبقى معناه إن العالم كله في خطر بسبب القوة العظمى دي، عشان الأجسام المتطورة بتاعتها دي موجودة في كل حتة من العالم كله، وبقالها أكتر من 70 سنة بتتشاف في السماء.. يعني صعب أوي يكون عندهم تكنولوجيا زي دي، ولسه مش ظاهرين في الصورة أكتر من كده!
● الإحتمال التالت بقى، واللي هو مرعب ومقبض بشكل لا يقاس، هو إن كوكب الأرض بتاعنا اللي احنا عايشين عليه بيتم زيارته من كائنات فضائية غير أرضية Extraterrestrials أو كائنات علوية من أبعاد أخرى Extradimensional Creatures، والكائنات دي بيقدروا يسافروا ما بين الكواكب أو الأبعاد، ومتطورين تقنيًا أكتر مننا بشكل لا يستوعب من الأساس، لدرجة إن التكنولوجيا بتاعتهم أشبه بالسحر بالنسبة لنا!!..
حد هيسألني طب ليه مش بيتواصلوا معانا، وساعتها هقولك احتمالين.. الإحتمال الأول هو إنهم لسه بيدرسوا قدراتنا العسكرية أو مدى عدوانيتنا وعنفنا تجاه بعض أو تجاه أي غريب، وده اللي نتايجه بناءًا على الحروب اللي قامت على الأرض في خلال الـ 70 سنة اللي فاتوا مش هتكون مطمئنة، أو ممكن الإحتمال الثاني اللي بيقولك إنهم مش عايزين يتدخلوا في حياتنا أو تاريخنا عشان ميأثروش على منحنى التطور العلمي والإجتماعي بتاعنا بشكل ممكن ينسفه من أساسه.. ومستنيين بس إننا نوصل لقدر كافي من التقدم يخلينا نقدر نفهمهم ونفهم تطورهم التقني الغير معقول، ونتواصل معاهم!!
طبعًا زي ما أنت شايف، كلها احتمالات مرعبة، وخيالية أكتر من بعض.. بس الشيء الوحيد المؤكد هو إنها حقيقية.. ومش أنا اللي بقولك كده.. ده حكومة الولايات المتحدة الأمريكية، اللي هي أكبر قوة عسكرية على وجه الأرض هي اللي بتقولك كده، وبتقولك إنهم مش عارفين يفسروها، وإنهم مرعوبين على أمنهم القومي زيهم زيك بالضبط..
لسه في تفاصيل أكتر هيتم كشفها في الأيام الجاية، وتفاصيل أنا مقلتهاش في المقال ده، وهتكلم عنها في مقال جديد مذهل أكتر .. ولحد وقتها إسرح بخيالك وتفكيرك في كل الحقائق دي، وفكر في المعاني المذهلة اللي بتختفي وراها..
أخيرًا، لو الموضوع عجبك، متنساش تعمل شير ومنشن لصحابك وحبايبك المهتمين بالأمور دي عشان يقرأوا معاك ويسيبولي رأيهم مع رأيك في كومنت
الشير بيعبر عن دعمك، وكمان بيساعد في نشر المجهود الكبير اللي ببذله في كتابة المقالات دي، وبيوصله لناس أكتر، ف متبخلش به لو شايف الجهد يستحق
الكاتب :: محمد علام
